Manchester United ṭantute tan chanchin lawmawm a thleng leh ta. An academy rawlthar theihna sang tak nei, mi tam tak ngaihven hlawh chho mek Noah Ajayi chuan club-ah professional contract a ziak fel ta a ni.

Kum 17 mi Ajayi hian hun rei tak daih tur 'long term professional contract' a ziah thu United chuan thuchhuah siamin an puang a. Club lam chuan rawlthar an ngaihsak zia tarlangin he chanchin an puanzar rual hian 'In youth we trust' (Ṭhalai-ah rinna kan nghat) tih thupui an hmang tel bawk.

Ajayi hi 2025-26 season chhung khan academy level-ah a rawn langsar chho hle a, season liam taa hmasawn chak berte zinga mi a ni. FA Youth Cup-ah hla tak aṭangin goal mawi tak a khung a, Premier League Cup Final-ah hma hruaina goal a khung bawk. Chu mai bakah, United under-18 team-in Newcastle an hneh ṭum pawh khan he left-winger hian goal a lo khung tawh bawk a ni. Club-a player naupang beiseiawm zualte list-ah pawh a hming hi a langsar pawl a ni char char reng a ni.

Tun hnai transfer window liam ta chhung khan Brentford chuan Ajayi hi an lo ngaihven hle a, club dang lama loan-a a chhuah theih dan chungchang pawh sawi a lo awm tawh bawk. Kumin November thla hian kum 18 a tling dawn a, tun season lo awm turah hian first team squad-ah seng luh theihna chance a nei chho dawn a ni. Contract rei tak daih a ziah tak avang hian United tan pawh thla muang takin tawn hriat nei tura loan-a chhuahtir theihna dinhmun ṭha a siamsak dawn bawk a ni.

Ajayi hi Germany youth international niin, kumin tir lam khan Germany aiawhtuin a vawi khat nan a inlan tawh a. Hemi rual hian Nigeria aiawh thei dinhmunah pawh a ding tel bawk a ni.

United tana Ajayi-a'n contract a ziak fel ta hi club tan chuan a pawimawh em em a ni. A chhan chu an wonderkid dang JJ Gabriel chuan La Liga lam pan a tum nia hriat a nih avangin, Gabriel an chan maithei dinhmuna an din lai hian Ajayi chelh theih hi thil ṭha tak a tling a ni. Gabriel hi season liam ta khan United rawlthar langsar ber ni mah se, Ajayi pawh hi a hnufual bik miah lo a ni.

Gabriel aiin Ajayi hi kum hnihin a upa zawk a, a san zawng leh a taksa len lamah pawh first team senior football hmachhawn turin a inpeih zawk nia ngaih a ni. United tan chuan Gabriel bakah Ajayi chan tel lehzel chu thil huphurhawm tak a nih dawn avangin, Ajayi-a'n United tana a inpekna a tarlan a, contract thar a ziak ta hi club tan hmasawnna pawimawh tak a ni.