Manchester United-in Champions League match pathumna khel tura Italian club Como 1907 an luhchhuahna tur chu, Lombardy biala ruah a sur nasat em avangin ṭhulh a nih theihna dinhmunah a awm mek. Red Devils te hi khualmualah zin mah se, he match hi khelh a ni dawn nge dawn lo tih chu a chiang lo hle a ni.

Como awmna Lombardy region-ah hian ruah sur nasat avangin 'orange weather warning' chhuah a ni a. Hei hi khawchin thalo leh hlauhawm tak avanga fimkhur tura hriattirna an lek chhuah a ni. Ni hnih chhung zet ruah hi a sur tawh avangin, Stadio Giuseppe Sinigaglia khelmual chu tuiin a chimpil lek lek a, khelmual dinhmun a chhia hle a ni.

Match ṭan hmain ruah 64mm vel lai sur tura rin a ni a. Stadium-a stand 4 awm zinga pakhat chauh hian chungleng a neih avangin, stadium-a a hmuna tawm tur Manchester United leh Como fan-te tan pawh hun harsa tak a ni dawn a ni. Ṭek tlak bakah ṭharawl hlauhawm a awm chung pawhin, Como lam erawh chuan khelmual hian a tlin an rin tlat avangin inkhelh hi ṭhulh loh a nih hram an beisei thung.

United hian tun season Champions League match hnih an khelh tawhah hnehna vawikhat changin, vawikhat an tlawm tawh a. Pressure hnuaia awm mek an manager Michael Carrick erawh chuan khawchin chungchang chu engahmah a ngai duh lem lo.

Carrick-a'n, "Engmah buaina ka nei lo, ruah sur te chu kan ṭhangthlawp sa tawh alawm. A theih ang angin ka chhawr mai ang," tiin confident takin a sawi.

Manchester club hi tun season-ah inelna hrang hrangah vawi hnih chauh an la chak a, kum 40 chhunga season bul ṭan chhiat ber kum an hmang mek a ni. An hmachhawn tur Como hi Arsenal star hlui Cesc Fabregas-a enkawl an ni a, United defender hlui Willy Kambwala pawh an squad-ah a tel a ni.

Thawhlehni training-ah khan Carrick-a player pawimawh mi 6 ngawt an tel thei lo a. Ayden Heaven, Kobbie Mainoo, Marcus Rashford, Lisandro Martinez, Luke Shaw leh Patrick Dorgu te chu inlan thei lo an ni a, hei hian an match khelh tur team selection atan ngaihtuahna a tipunlun dawn a ni.

Kum 40 chhunga season bul ṭan chhiat ber hmang mek ni mah se, Carrick chuan club hotu liante ṭhawpna a dawn tlat nia a hriat thu a sawi.

Carrick chuan, "Rinna siam thar emaw inthlamuanna thu hriat ka mamawh lo. Thil a chiang reng a ni. Ka hna leh ka mawhphurhna ka hria a, thil a kal ṭha a nih leh chhia a nih pawhin min hrilh nawn tur ka mamawh lo," a ti.

"A tak takin thil a kal a, harsatna engmah ka nei lo. Engkim a hmuna a luh zui leh theih nan football match-ah hnehna kan chan a ngai tih ka hria a ni. Hotute ṭhawpna ka dawng tlat alawm, a chhan chu club-a hotu zawng zawng nen inlaichinna ṭha tak kan nei a, hemi lamah hian buaina engmah a awm lo," tiin a sawi bawk.