Como manager Cesc Fabregas-a'n manager a nih aṭanga a vawikhat nan Manchester United a hmachhawn dawn takah chuan, kum 20 liam taa a player tawn liau liau "Pizzagate" thil thleng chu a rawn riknawn leh ta.

October 2004 khan Arsene Wenger-a enkawl Arsenal chuan Premier League-a a zawnin match 50 chhung tlawm lova rekawd thar siam tumin Old Trafford an pan a. Mahse, he match thil thleng hi inkhelh chhung aiin match zawha tunnel-a thil thleng avangin chanchin ziaktu te leh football fan-te rilruah a cham ta zawk a ni. United manager Sir Alex Ferguson-a hmai leh kawrah pizza bawk vawm a ni a, he thil thleng hi 'Pizzagate' tiin hming koh a ni zui ta a ni.

A tirah chuan he pizza vawmtu hi tu nge tih hriat a ni lova, rinhlelh hrang hrang a awm nual a. Arsenal centre-back hlui Martin Keown-a'n "Spanish pa chet thiam tak pakhat" tiin a sawilawk a, he thil titu hi Fabregas-a a nih rinna a lian chho ta hle. Ferguson-a ngei pawhin Fabregas-a chu a rinhlelh ber te zinga mi a nih thu a lo sawi tawh bawk.

A tawpah chuan Sky show 'A League of Their Own'-ah inlanin, Fabregas-a chuan he buaina zawng zawng hi ama tih a nih thu a nemnghet ta a ni. A team-mate hlui Keown-a sawi dan chungchangah lawm vak loin, "Martin Keown chu dawthei a ni, ka hmaah mi a hnek pawp pawp lai ka hmu a, engmah a hmu ve hman lo. Rinbur lovin ri rak rak ka hria a, 'Eng thil nge thleng ta?' tiin ka pizza slice nen ka va chhuak a. Sol Campbell, Rio Ferdinand leh Martin Keown-te ininawr buai vel ka va hmu a ni," tiin a sawi.

Fabregas-a chuan sawi chhunzawmin, "Kha buainaah khan luh ve ka duh a, mahse luh dan ka hre mai si lova, pizza chu ka va vawm ta ringawt mai a ni. A va fuh hnua tu nge a fuh tih ka hmuh khan ka phu zawk a, a fuh ber kher hi vawm ka tum reng pawh a ni lo," tiin a sawi.

beIN Sports hnenah pawh Ferguson-a hnenah mimal tak leh mipui hmaah ngaihdam a dil tawh thu a sawi lang bawk. "Ferguson-a a va fuh tih ka hrechhuak a, mipui hmaah ngaihdam ka dil tawh a, ka dil nawn leh bawk ang. Tum reng vanga ti ka ni lova, kha mi ṭuma thil thleng thut mai a ni. Kha mi ṭum khan ka la naupang em em a, tunah phei chuan pizza hmangin mi ka vawm tawh miah lo ang," tiin a sawi.

ITV nena an ininterview ṭumin Fabregas-a chuan kha mi ṭuma a rilru dinhmun chungchang chu a hrilhfiah leh a. "Match 49 chhung tlawm lovin kan awm a. Bench-ah ka ṭhu a, warm-up nei char char mah ila ka khel ve ta si lova, kan tlawm bawk nen ka lungawi lo hle a ni. Dressing room-ah hmanhmawh takin ka lut a, eitur a lo awm a, ka ṭam tawh hle bawk. Pizza slice pakhat ka la a, mual pawn lam aṭangin thawm ka hria a. Insualna chhunga luh ngamna tha leh huaisenna ka neih tawk loh avangin, pizza vawm chhuah mai kha ka rilrua rawn lang hmasaber leh ka tih theih awmchhun a ni," tiin a sawi bawk.