Manchester United legend Rio Ferdinand chuan an club-a naupang theihna ngah tak, chhuah tum mek JJ Gabriel-a boruak chho mek chungchangah United hotute hnenah thuchah tlang tak a thlen.
Tun thla tir lam khan kum 15 mi Gabriel hian United hi a hmun aṭanga chhuahsan nghal a duh thu official-in a lo thehlut tawh a, hei hian club hotute a ti bangbo hle a ni. Kum 11 a nih aṭanga United academy zawmtu Gabriel hi academy-a player theihna ngah ber leh beiseina sang ber dawngtu a ni a.
Kum 14 chauh a nih laiin Under-18 tana debut siamin, first-team training-ah pawh vawi engemaw zat a tel tawh bawk. Carabao Cup-a Brighton & Hove Albion laka an tlawm ṭum khan senior debut siam tura beisei a ni a, mahse club chhuahsan a duh tak avangin he ruahmanna hi ṭhulh a ni ta a ni.
Gabriel-a pan duh ber chu Spain lam nia ngaih a ni a, Barcelona leh Real Madrid ten an ngaihven hle a. Hemi bakah hian Bayern Munich, Paris Saint-Germain, Chelsea, Arsenal leh Manchester City te pawhin he rawlthar hi an hel mek bawk. United lam hian kum 15 mi hi awm zui zel tura hmin la tum hram mah se, an thawhrah a chhuak dawn lo nia langin an beidawng chho mek a ni.
A YouTube channel-ah Ferdinand chuan Gabriel-a theihna a fak hle a, mahse United chu naupang thuneihna hnuaiah an kun tur a ni lo tih tlang takin a sawi.
Ferdinand chuan, "A tir berah chuan, he naupang theihna hi a mak zawk a ni. A theihna sang zawng pawh hi ka hre thiam lo hial a ni. A inkhel ka hmu tawh a, a training lai pawh ka hmu a, kum tam tak lo coach tawhtute sawi pawh ka ngaihthla tawh a, he naupang hi a chungnung ber pawlah a inhlangkai dawn tih rual a awm lo. Club chhuahsan a duh chhan hi kan hriatfiah hmasak a ngai a ni. Kum 15 mi lek a mahin thutlukna a siam a ni lova, a chhungte pawhin chhan leh vang an nei te pawh a ni thei," tiin a sawi.
Premier League title vawi ruk ngawt chawitu Ferdinand chuan a sawizawmnaah, "An hmanhmawh lutuk zawk nge, minute a hmuh tam tawh loh avanga lungawi lo zawk, an thil tiamte tihlawhtling lova ngai an ni zawk tih kan hre lo. Training a neih lai khan Bruno Fernandes nen shooting drill an neih dun ka hmu a. Bruno hi PFA Player of the Year leh khawvela midfielder ṭha berte zinga mi a ni. Kum 15 mi lek ka nih lai hian chu chu ka tan chuan a tawk em em a ni. Mahse, beiseina sang zawk neiin inkhelh ṭan nghal mai a duh pawh a ni thei.
"Mahse Manchester United hi he naupang kum 15 mi hian eng ti ang pawhin theihna ṭha nei mah se, a thunun tura ngaih an ni tur a ni lo. Eng pawh thleng se, Manchester United hi nghet takin an ding tlat tur a ni. Naupang dangte hian entirnan an hman dawn avangin football club puitling an nih angin hotu dawrawm tak angin an lang tur a ni lo. Mahse, thudik tling a taka thleng zawng zawng erawh ka hre vek lo tih ka sawi nawn leh e," tiin a sawi bawk.
Manchester United hi October ni 10-ah Old Trafford-ah Tottenham Hotspur mikhualin inelna tak taka an match leh tur an hmachhawn dawn a ni.
