Kumin nipui transfer window khar dawn hnaiha Manchester United-in lakluh an lo tum rawlthar Louis Page chuan, Old Trafford club-in an ngaihvenna chungchangah a vawi khat nan a ngaihdan a sawichhuak ta.

Kum 18 mi midfielder Page hi transfer deadline day darkar tlemte a la awm thleng khan United nena sawizawm a ni a. Mahse, United leh Leicester City te hian a man zat turah inremna an neih theih tak loh avangin he inremna hi a ṭhulh zui ta a nih kha. Manchester Evening News-in a tarlan danin, United hian Page hi an la ngaihven reng a, January transfer window hmachhawn turin Leicester nen hian inbiakna kawng an la hawng reng a ni.

Hetih rual hian Arsenal pawhin he rawlthar hi an ngaihven ve bawk a, Leicester City lam hian Manchester City hnena Jeremy Monga an hralhna man £10million leh add-ons £2.5million an dawn aia tam an phut thung. He inremna hi tihpuitlin a nih pawhin, he tlangval hi tun season tawp thleng chu League One club Leicester-a loan-a cham zui tir tura ngaih a ni.

Transfer chungchang sawi a tam em em laiin, Page erawh chuan tun season tharah rilru a pe pumhlum hle a. Leicester manager Russell Martin-a hnuaia a khelh theihna chuan tunah leh nakin zelah pawh amahah hmasawnna lian tak a thlen ngei a ring tlat a ni.

BBC Radio Leicester nena an inkawmnaah, nipui laia a chanchin sawi vawrh vel chungchang sawiin Page chuan, "Boruak a vir thuk hle a, thil tam tak a thleng bawk. Mahse ka tan chuan rilru sawrbing hi a pawimawh ber a ni. Leicester player ka ni a, contract ka nei bawk a, ka thiltum ber chu he club hi Championship-a kaisan pui leh a ni a, chu chu ka duh ber pawh a ni," tiin a sawi.

"Rilru pek ṭhat kawngah hian manager-in min pui nasa em em a. Hetah hian cham zel turin min duh a, nakina player ṭha tak ka la nih theih nan ka ṭhanglian thei tih a ring tlat a, chu dinhmun min thlenpui theih chu keipawhin ka ring a ni," tiin a sawi zawm bawk.

Deadline day darkar hnuhnung bera sawiselna leh thawm a rik mur mur lai khan, Page hi Plymouth Argyle nena an League One match khelh tur atan a lo inbuatsaih mek a. Leicester-in 2-0 a hnehna an chan ṭum khan assist a nei a, inkhel tur team list-a a hming a tel tak avang khan United lama a insawn theihna beiseina chu a tawp ta a ni.

"Ka tan chuan ka khel dawn tih ka inhriat avangin inkhelah chauh rilru ka dah a. 'Pawn lama thil thleng chu a thleng ang ang khan lo thleng se, ka inrawlh ve a ngai lo' tiin ka inngaihtuah mai a ni. Kan tana mahni muala match pawimawh a ni a, inkhelh ṭhat leh kan chak ngei theih nan rilru ka pek a ngai tih kha ka ngaihtuah ber a ni," tiin a sawi.

United-in an ngaihvenna chungchang sawi zelin Page chuan: "Thil lawmawm takah ka ngai a ni. Hetiang club lianin min ngaihven a nih chuan, khelmuala ka thil tihṭhat vang a ni chiang a. Chuvangin ka theihna ka pholang zel ang a, mipuite chuan an duh duh lo sawi mai mai se, kei erawh khelmual chhungah chauh ṭawng ka duh zawk a ni. Ka nu leh paten rilru puitling tak pu turin min pui reng a, 'Leicester-ah i awm mek a, tumahin thildang an sawi loh hi; chuvangin khelmualah zalen takin va khel la, ṭha takin va che rawh' tiin min hrilh ṭhin," a ti bawk.

January thleng transfer window a khar tak avangin hahdamna a thlen thu sawiin, "Leicester-ah hian rilru ka pe pumhlum a, tunah chuan bazar a khar tawh bawk a, hetah hian ka cham dawn tih ka hria a, mi zawng zawng pawhin an hria. Chuvang chuan sawi kual velte pawh a reh tawh ang a, Leicester tana ka khelh leh khelh lohah chauh an rilru an dah tawh ang," a ti.

Page hi season liam ta khan kum 17 mi lek a nihin Leicester first team-ah a rawn inlan ṭan a. Tun hnaia inelna hrang hranga an match khelh hnuhnung pangaah bul a ṭan vek a, kar kalta khan Stockport County 4-3 a an hneh ṭumin an goal li khung zinga pathumah a inrawlh bawk a ni.

"Leicester hian engkim min pe a, first team-ah khelhna hunṭha min pe bawk. League hnuai zawkah kan tla thla a, tunah chuan min puitu academy staff-te leh coach-te lakah bat ka nei a, he mawhphurhna hi lain club hi Championship-ah ka hruaikir leh ngei a ngai a ni," tiin a sawi bawk.