Stamford Bridge-a Chelsea hmachhawn tur Manchester United team-ah captain Bruno Fernandes-a tawnhriat nei ṭha tak a rawn kir leh hi a ṭangkai hle dawn tih head coach Michael Carrick chuan a sawi.

Champions League-a Como laka an tlawm hnua Carrick-a tactics sawiseltu United captain hi kar kalta khan team aṭangin lakchhuah a lo ni tawh a ni. Bournemouth laka 3-0 a an tlawm ṭum khan Fernandes hi bench-ah dah niin, match chhungin chhawr a ni lo hrim hrim a ni.

Bournemouth laka an tlawm hnu hian Carrick chu ban mai dinhmunah a ding a, mahse hotute nen inbiakna an neih hnuah a hna a chhunzawm ta zel a ni. Thawhlehni khan head coach leh captain te hi inbiain, an inkar buaina chu an chinfel tak thu match hma press conference-ah Carrick chuan a lo nemnghet tawh bawk.

Match ṭan hmaa MUTV a kawmnaah Carrick chuan Fernandes starting line-up-a a dah kir leh chhan fiah takin a sawi a. "Bruno hi player pawimawh tak a ni a, a tawnhriat ngah tak hmang hian thil tam tak min pe thei a ni. Helai hmuna hun rei tak a lo awm tawh chhungin thil tam tak a lo hlawhtling pui tawh a, team tana a thawhhlawh zia leh a thil thlen theih pawh a phochhuak tawh ṭhin.

"Chuvang chuan kan team tan hian mi pawimawh tak a ni a, vawin hian team inbalansi ṭha tak kan nei nia ka hria. Team ṭha tak kan nei a, tlangvalte pawh an phur tawh hle a ni," tiin a sawi.

Season liam ta khan Stamford Bridge-ah Matheus Cunha chuan chakna goal a lo khung tawh a ni. Cunha chungchang leh goal khung chungchang sawi zuiin Carrick chuan, "Goal khungtu tur leh danglamna siamtu tur chu tu pawh nise, chu tak chu a mawi chhana chu a ni. Hun remchang thar leh hunṭha a thleng reng a, vawiinah hian Matheus-a pawh ni se, player dang pawh ni se, an theihna sang ber phochhuahna tur hun a awm reng a ni. Emaw team pum chet ṭhatna hmanga hnehna lak te pawh a ni thei, chu tak chu kan zawn ber a ni," tiin a sawi bawk.