Manchester United-in 2026/27 season bul an ṭan chhiat em avangin head coach Michael Carrick-a chungah pressure a sang hle a, mahse club ṭantute erawh manager aiin club hotu liante lakah an lungawi lo zawk a ni. Old Trafford club-a thil thleng mek leh club hmakhua chungchangah United thuneitute hian fan-te hnenah fiah zawka hrilhfiahna an neih a ngai em tih zawhna chu Carrick hian chhan a hreh hle.

United hian tun season-ah bul an ṭan chhe hle a, inelna hrang hrangah match 12 an khelh tawh zingah vawi hnih chauh hnehna an la chan a ni. Vawiin tlai hian hmun hnihna lama thil thleng duhawm lo tak hmachhawn mek Chelsea chu Stamford Bridge-ah an hmachhawn dawn a, Carrick-a naute hian hnehna an chan zawh loh chuan a hna aṭanga ban tur zawnga sawi zuina hi a zual leh sauh dawn a ni.

Carrick-a hna a derthawng mek lai hian, fan-te lungawilohna leh vuina erawh United player-te leh club hotute chungah a bur zawk a ni. Kar liam taa Old Trafford-a match an khelh ṭum khan fan-te chuan club neitute leh thuneitu liante dodalna hla sain, match zawhah player-te chu khelmual aṭangin an lo au el (booed) a nih kha.

Club panna tur tak tak hrilhfiah tura fan-te nena inbiak pawh a ṭha zawk em tih zawhna TNT Sports-in an neih chungchang sawiin Carrick chuan, "Hetiang bang pawn lam aṭanga thil thleng chhunga ka ngaihven ber chu support-tu fan-ten eng nge an ngaihtuah a, engtin nge an awm tih hi a ni. Chu zawng chu ka tana pawimawh ber a ni, a chhan chu he dinhmunah hian kan awm tlang vek a ni," tiin a sawi.

Carrick chuan sawichhunzawmin, "Tih tak zetin kan tuihal a, kan phur hle bawk. Sawi zui leh ṭawng a awm dawn tih chu kan hria - mahse chungte chu ka ngaihsan zawng a ni lo, kei chuan team hi ṭha zawka kan awm lehzualna kawngah chauh ka rilru ka fuktir a ni," tiin a sawi bawk.

Thawhṭanni khan United director of football Jason Wilcox leh chief executive Omar Berrada te chuan club neitute nen Carrick-a hma hun leh hun pek belh chungchangah inbiakna pawimawh tak (crisis talks) an lo nei tawh a. Khatih ṭum khan hun pek chhunzawm rih tura thutlukna siam ni mah se, vawiin tlaia an tlawm leh a nih chuan Carrick-a tan chhuahna kawngka a hnaih sauh dawn a ni.

May thla khan Old Trafford-ah hian kum hnih daih contract a lo ziak ṭan chauh a, mahse thla tlem te ral taah a dinhmun chu ban tawh mai thei dinhmun hlauhawm takah a ding mek a ni.