Manchester United striker hlui Dion Dublin chuan kum 1992 khan Old Trafford-a Sir Alex Ferguson nen an inhmukhawm hnuah phur takin contract a ziak a, a hlawh zat tur pawh hre hmasa lovin Chelsea leh Everton te a hnawl thu a sawichhuak.
Dublin hian Norwich City academy aṭangin a football zinkawng a ṭan a, Cambridge United-ah a hming a chher chho hle. Mahse, kum 1992 khan Cambridge chu Premier League-a kaisang zo lovin an tlawm a, he striker hi hralh chhuah theih tura chhawp chhuah niin club eng emaw zatin lakluh an inchuh ta a ni. Chung zingah chuan Manchester United chu langsar berin, pound maktaduai khat (£1m) thehchhuakin Dublin hi an lalut ta nge nge a.
Old Trafford-ah erawh Dublin-a vanneihna a tluang zui lo. A ke ruh a tliah nasat em avangin inelna hrang hrangah match 17 chauh a inlan hman a, a inkhelh theih loh chhungin Eric Cantona lakluh niin a hmunruak a luah zui bawk. Hemi hnu hian kum 1994 khan Coventry City lam a pan ta a ni. Chuti chung pawhin kum 57 mi Dublin hian Ferguson nen an inhmuh hnu khan United-in an hip hneh em avangin a hlawh tur zat pawh ngaihtuah lovin a inziaklut tih a sawi a, Manchester-a a tawn hriatte chuan a hmalam hun a chher hle tih a tarlang.
'In The Mixer' podcast-a a sawinaah Dublin chuan, "Hmun hnai aṭangin kan ṭan a. Chelsea aṭangin kan ṭan a, Ian Porterfield kha an manager a ni. Stamford Bridge-ah ka aiawhtute nen kan kal a. Dawhkanah chuan Porterfield leh a thawhpui pariat bakah ṭhutthleng ruak pakhat a awm a. Kan ṭhut veleh Porterfield chuan, 'Dion, nangmah thunun tu tur chein team din ka duh a, kan number 9 jersey hi i ha thei ang,' a ti a. Ka rilruah chuan, 'A va ropui ve, Chelsea an ni lehnghal,' ka ti hman a ni," a ti.
"Chumi hnuah Everton-ah kan kal leh a, Howard Kendall kha a awm a, training ground-ah kan lut a. Howard chuan min lo lawm hle a, champagne min thlit sak nghal a. Zing dar 11 chauh a la ni a, player dangte chu khelmualah an la training mek a nih kha! Mahse champagne chu no khat ka in ve tho a ni. Hemi hnu hian Sir Alex hmu turin ka kal leh ta a. Sir Alex chuan car park-ah min lo nghak a. Ka aiawhtute nen kan thleng a, ani pawh sum lam buaipuitute nen an rawn lang a, 'Ka rualin lo kal rawh. Nangni ho khan contract lam chu va sawi ula, ka rualin lo kal rawh,' a ti nghal bawrh bawrh mai a ni.
"Car park aṭang chuan stadium chhungrilah min kai lut a. Khang hun lai khan insukna hmun te chu stadium-ah khan a awm a, jersey leh boot zawng zawng pawh a awm vek. Chutah chuan kal tlangpuiin mi zawng zawng hming lamin chibai a buk zung zung a. Thingpui lumtute, chaw chhumtute thlengin a hre vek. Tunnel-ah kan lut thla a, khelmual lam panin kan chhuak phei a. Dugout inkarah min kalpui a, ka darah a kuah a. Khelmual laili (centre spot)-ah min dinpuiin, 'Kar hnih dana helai hmuna rawn khelh ṭhin hi engtin nge i ngaih?' tiin min zawt ta a ni.
"Hmun tin ka thlir kual a, 'Cambridge khelmual Abbey ai chuan a lian hret a nih hi,' ka ti rilru a. Engzat nge ka hlawh dawn tih pawh hre lovin United-ah chuan contract ka ziak ta tawp mai a ni. Ka ngaihsak lo a, ka buai lem lo bawk. Cambridge-ah khan kar khatah £275 chauh ka hlawh a, a aia chhe zawk a awm thei tawh dawn chuang hleinem," tiin Dublin chuan a sawi.
United-a hun tawi te a hman hnuah Coventry City tan Dublin hian game 162 khelhin goal 72 a khung a. Hemi hnu hian Aston Villa panin match 192-ah goal 59 a thun leh bawk. Millwall-a loan-a a awm zawk hnuin Leicester City, Celtic leh Norwich City-ah te a khel kual a. A hlawh chungchang sawi zelin, "United-ah khan kar khatah £2,500 ka hlawh a, khang lai khan a tam hle. Coventry-ah khan £5,000 emaw £6,000 emaw ka hlawh chho a, goal ka thun deuh hnuin £10,000 leh £15,000 a kai chho a, £20,000 ka hlawh laiin ka chhuahsan a ni. Villa-ah khan £20,000 hlawhin ka zawm a, season hnih hnuah £25,000 ah a kai a. Villa-a ka season hnuhnung berah kar khatah £35,000 ka hlawh a, ka hlawh san ber ṭum a ni. Tunlai sum chevel nen chuan inthlau tak a ni," a ti bawk.
