November thla thleng international break a awm tawh dawn loh avangin Manchester United tan chuan match a inlar zut tawh dawn a. Old Trafford-a Tottenham Hotspur nena 1-1 a an inhnehtawk ṭuma point hlu tak an hloh hnuah, Red Devils te hian Champions League lamah an rilru an pek leh nghal a ngai dawn a ni.

Champions League opening match-ah Sabah chu 4-0 ngawta an hneh tawh hnuah, United hian Spanish khawpui Madrid-ah Atletico Madrid an tlawh dawn a, tun ṭumah erawh an hna a hautak tawh zual hle dawn a ni.

United leh Atletico Madrid te hi an chanchinah inelna tak takah (competitive match) vawi li chiah an la inhmachhawn a. Kumin nipui khan Sweden-ah pre-season match khel dun tawhin, Bryan Mbeumo-a goal hnih khung hmangin United hi 2-1 in chak tawh mah se, inelna puitling match li an khelh tawhah erawh United hian Spanish club lian hi vawi khat mah an la hneh ngai lo thung a ni.

Kum 1991 Cup Winners' Cup-ah khan khualmualah 3-0 ngawtin an tlawm a, Old Trafford-ah 1-1 in an inhnehtawk bawk a nih kha. Champions League-ah pawh an lo inhmachhawn tawh bawk a, 2021-22 season khan Madrid-ah 1-1 in an inhnehtawk a, mahse mahni mualah second leg-ah 1-0 in an tlawm zui leh a, inelna aṭangin an lo tla tawh a ni.

Atletico laka an record chhe tak bakah hian, United hian Spanish club dangte laka an record ṭha tawk lo tak chu an paltlang a ngai bawk ang. Spain aṭanga team te hi vawi 78 lai an lo hmachhawn tawh a, mahse vawi 25 chauh hnehna an la chang a, vawi 28 inhnehtawkin vawi 25 lai an tlawm tawh bawk a ni.

Hetiang a nih rual hian hmasawnna erawh hmuh tur a awm chho ve mek thung a; Spain club laka an match 10 hnuhnung berah vawi khat chiah an tlawm a, vawi ruk hnehna an chang tawh a ni. A hnuhnung berah phei chuan 2025 Europa League semi-final second leg-ah Athletic Club chu 4-1 ngawtin an lo sawp a nih kha.

Chutih rualin tun dinhmunah United hi form ṭha lo tak chungin he inkhel hautak hi an pan dawn a. August thlaa Ipswich Town an hneh aṭang khan ram chhung inelna (domestic match)-ah vawi khat mah hnehna an la chang leh miah lo a ni.

An khingpui tur Atletico Madrid lam erawh an che ṭha tluang hle thung a, inelna hrang hrangah a zawnin match li lai hnehna an chang tawh a, thla liam ta khan an hmelma lian Real Madrid chu 2-1 ngawtin an lo hneh tawh bawk a ni.

Mahse United tana beiseina tlem tal awm chu, Atletico-in tlawm an tawn hnuhnun ber kha English team lakah a ni a; September thla khan Anfield-ah Liverpool lakah 2-1 in an tlawm a ni. Red Devils te hian Madrid khawpuiah Spanish club laka an record chhe tak hi an siamṭha thei ang em tih chu nghahhlelhawm tak a ni ta a ni.