Manchester United chuan Champions League inelna lamah rilru an pek leh a ngai tawh dawn a, mahse tun kar hian khualmualah elpui khawng tak Atletico Madrid an hmachhawn a ngai dawn thung. Thla hmasa khan Michael Carrick-a naute hian Azerbaijan champion FK Sabah chu awlsam takin 4-0 in an lo sawp tawh a, mahse tun ṭumah erawh fiahna hautak zawk an tawk dawn a ni.
Spanish club Atletico Madrid hi an ram inelna La Liga-ah an che ṭha chho hle a, an league game hnuhnung paliah a zawnin hnehna an chang tawh a ni. Inrinni liam ta khan Alaves chu 2-1 in an hneh bawk. Chutih laiin Manchester United erawh Premier League-ah an talbuai chho hle thung a, an league match hnuhnung pali an khelhah vawikhat mah hnehna an la chang lo a ni.
He inkhel hmachhawn tur chungchangah hian Spanish chanchinbu lar Marca chuan United dinhmun tarlangin, "Atletico-in Champions League-a an hmachhawn leh tur Manchester United te chu an la talbuai chhunzawm reng," tiin an ziak a. Mahni mual Old Trafford-a Tottenham nen 1-1 a an inhnehtawk chungchang sawi zuiin, "Point 18 hmuh theih aṭanga point 6 chauh hmu a, 13-na dinhmuna awm mek United tana buaina chu Tottenham hian an tizual sauh a ni," tiin an tarlang bawk.
Inrinni-a Alaves an hneh hnu lawkah, Atletico manager Diego Simeone chuan Pathianni khan an player-te chu training nei turin a ko nghal a. Spanish media AS tarlan danin, Atletico hian hliam vanga harsatna an tawk lo a, an player zawng zawng chhawr theihin an inpeih thlap a ni. Kumin nipui laia club nena an inkar buai deuh hnu pawha inrem leh ta, forward Julian Alvarez pawh inlan thei tura inpeih vek zinga mi a ni.
Atletico-in La Liga-a a zawna vawi li hnehna an channa hi Champions League-a Anfield mualah Liverpool laka 2-1 a an tlawm hnua an thawhchhuah a ni a, Manchester United lakah hian theih tawp chhuah a, chak ngei an tum dawn tih a chiang hle. Season ṭan hma pre-season friendly neutral venue-a an khelh ṭum khan United hian Atletico hi 2-1 in an lo hneh tawh ngei mai a, mahse Spain rama va tlawh erawh thil danglam hlak a ni dawn a ni.
Champions League-ah Atletico hian mahni mualah tlawm an nei khat hle bawk. April thlaa quarter-final-ah Barcelona lakah 2-1 in tlawm mah se aggregate hmangin an tlang thung a, hemi hma mahni muala an tlawm hnuhnun ber chu October 2024-a Lille laka an tlawm kha a ni. United-in Atletico mual an tlawh hnuhnun ber chu kum 2022-a Ralf Rangnick-a enkawl lai khan niin, Anthony Elanga-a goal hmangin 1-1 in an inhnehtawk a nih kha. Tun ṭumah erawh Carrick-a pawlte hian fiahna hautak tak an hmachhawn a ngai dawn ta a ni.
