Manchester United-in season thar an hmang chhe chho hle a, Inrinni khan Old Trafford-ah mi 10-a khel Tottenham Hotspur chu 1-1 in an inhnehtawkpui leh ta a. Dominic Solanke-a'n hun tawp dawn hnaiha Tottenham siphurh a rawn sut tak avang khan head coach Michael Carrick chuan Premier League-a a kir leh hnuah tlawm tluk hiala na a tawng leh ta a ni.
International break chhung khan insiamṭhat a, season liam taa an theihna kha zawnchhuah leh beisei ni mah se, kum 40 chhunga an league campaign bulṭan chhiat ber an hmachhawn mek thung. Thawhlehni hian Spain ramah Champions League match pawimawh tak Atletico Madrid an hmachhawn zui nghal dawn a ni.
Mahni muala Spurs laka an point hloh hnu hian United defender hlui Gary Neville chuan team thlak danglam a ngaih tawh thu a sawi chhuak a. A bik takin tlar lailiah Kobbie Mainoo leh Youri Tielemans te inkawp chu chawlhsan rih turin a ngen a ni. Spurs laka an inkhelh ṭum khan Mainoo chuan vawi nga lai ball a hloh a, tualchhung player dang zawng aiin a tam ber. Tielemans pawhin pass hlawhtling 81 per cent chauh a nei a, beisei an phak lo dun hle.
The Gary Neville Podcast-ah Neville chuan, "Team hian tlan an peih tawk lo a, tumruhna leh beihlet duhna an lantir tawk lo a ni. Mipui au thawm aṭang pawh hian an inkhel en chu an lungawi lo hle tih a chiang reng mai. Tielemans leh Mainoo te hi chu kan hmu hnem tawk tawh viau a ni. Khel tawh miah lo tura tihtawp nghal ngawt chu thil lutuk a ni thei e, mahse he club tan leh Premier League-ah chuan che rang leh thapui thawh thei tawk an ni lo tih a lang chiang ta hle a ni. An pahnih hian player ṭha tak an ni a, mahse inkawp rem loh chang a awm ṭhin. Baleba a rawn luh hnu khan theihna leh tha thar a rawn luhpui a, midang zawng pawh hian ṭan an lak a ngai a ni," tiin a sawi.
Hliam aṭanga rawn dam chhuak Carlos Baleba hian Spurs lakah debut a siam a, bench aṭanga luhin a che ṭha hle. Chutih laiin nipui lakluh Andrey Santos leh Mason Mount te erawh bench-ah an ṭhu nileng thung a ni.
Hetih rual hian, United rawlthar hmingthang JJ Gabriel-a chanchin pawh a thar leh ta a. Kumin nipui aṭanga sawi hlawh he kum 16 mi forward lakluh tum hian Bayern Munich chuan inbiakna an nei ṭan niin chanchinbu chuan a tarlang a. Mahse January transfer window a hnaih tawh lai hian Bundesliga club lian aṭang hian dawrna tak tak erawh an la thehlut rih lo thung.
Sky Sport Germany tarlan danin, Bayern hian Gabriel-a hnen aṭangin thutiam hmasa an duh a, mahse he rawlthar hian Spain lama insawn a thlan zawk avangin inremna siam a harsa mai thei a, Barcelona leh Real Madrid pawhin an ngaihven ve reng a ni.
Tun thla tir lama kum 16 tling Gabriel leh a aiawhtute hian Old Trafford chhuahsan dan kawng an zawng mek tih chu thuruk a ni tawh lo. United erawh chuan club danga a chhuah theih nana player inziahluhna tihtawp a dilna chu an hnawlsak tlat thung a ni. Gabriel-a'n Europe ram danga khelh theihna permit a neih theih nan European Union (EU) passport a neih a ngai dawn a, Cypriot emaw Ireland ram passport emaw neih a tum mek avangin hei hi buaina a nih an ring lo. United chhungrilah hian Gabriel-a aiawhtute chuan first-team minute pek tam tiamna an phut avangin inrem lohna a chhuak mek a, chuti chung chuan United chuan an player naupang theihna ngah tak hi chelh tlat an la duh fan a ni.
