Khawvel football huanga chanchin thar lian ber ni chho mekah, Premier League-in sum lama dan bawhchhiatna thubuai 115 ngawt Manchester City laka an siamsak zinga 114-ah City chu thiam loh chantir an nih thu report a chhuak ta a. Engtiang chiaha hremna na nge an dawn dawn tih erawh puanzar a la ni rih lo a ni.

Ningani khan Manchester United ṭantute chuan he thutlukna hi lawm viau mah se, kum li chhung tehmeuh chhui a nih hnuah thutlukna thleng tur ringawt pawhin kum thum dang a ngai leh chu mak an tih thu an sawichhuak a. Tun dinhmunah chuan rorelna dik tak a awm theih nan City lakah hian hremna na tak lek a nih ngei an phut bawk a ni.

Mahse, City thiam loh chantir an nihna hian khelmual piah lamah nghawng lian tak a nei chho thei dawn a, a chhan chu City dan bawhchhiatna avanga sum leh paia channa tawk club dangte chuan zangnadawmna (compensation) phut an tum dawn tlat a ni. United pawhin 2009-10 leh 2022-23 season inkara City-in Premier League financial fair play dan an bawhchhiat avanga an sum hloh zat tur chu an club chhungrilah an chhut chiang (internal assessment) ṭan tawh hial a ni.

City-in Premier League nomawi an chawi chhung hian United chu vawi hnih ngawt pahnihna (runners-up) an lo ni tawh a. Kum 2012 leh 2018 season-ah khan United hi pahnihna an ni a, an manager hlui Jose Mourinho leh Ole Gunnar Solskjaer te pawhin City-in dan an lo bawhchhiat ṭhin avanga title an lo chan tak avang khan rilru na tak an lo pu tawh ṭhin a ni. Jose Mourinho phei chuan kum 2018-a pahnihna a nihpui ṭum khan City-in dan an bawhchhiat avangin chu title chu United ta tur a nih thu a lo sawi lang tawh a ni.

The Independent tarlan danin, City laka dan hmanga an khinletna a hlawhtling a nih chuan club-te hian zangnadawmna atan £200m chuang lai an hmu let thei dawn niin an tarlang a. Heng club pali zinga mi te chu Manchester United, Arsenal, Liverpool leh Tottenham Hotspur te an ni. Report chuan heng club-te hian dan thiam ho (law firms) an be kual mek a, an chanvo neih theih zat turte an sawiho mek bawk niin a tarlang a, thil chinfel a la harsa deuh bawk.

City tan chuan he thutlukna hi buaina tawp loh inṭanna zawk a nih hmel a, an tih theih tawk chu zualko theihna (appeal) kawng zawng zawng zawn a ni tawh mai thei. City thubuai hian club lian tam tak lakah sum thil avanga inbeihna lian tham a chawktho chho dawn niin a lang a, rorelna dik tak kengkawh tura beiseina a lian hle a ni.