Manchester United academy chhuak Harry Amass chu January thla transfer window inhawng turah Old Trafford a chhuahsan a rinawm hle ta. Kum 19 mi left-back hi United player naupang theihna nei ṭha berte zinga mi nia ngaih a ni a, first-team squad-a inlar chho tur bera beisei a ni ṭhin.

Amass hian Sabah laka si li faia an chak ṭum khan minute 71-naah bench aṭangin a rawn inlan ve hman a, Lisandro Martinez-a'n goal li-na a khung hnu lawka khelmuala lut a ni nghe nghe. Tun dinhmunah hian United manager Michael Carrick chuan an tlarhnungah hliam vangin harsatna lian tak a hmachhawn mek a ni.

Left-back Luke Shaw leh Patrick Dorgu te chu hliam avangin an inlan thei lo ve ve a, ke veilam hmang thiam central defender Martinez pawh chhawr theih a ni lo bawk. Chuti chung chuan Carrick hian Amass-a hmun ruat aiin, right-back Diogo Dalot leh Noussair Mazraoui te chu an khelhna hmun pangngai lo zawk mual veilamah a chhawr zawk ta tlat a ni.

Nipui liam ta transfer bazar chhung khan United hian Amass hi loan-a chhuah tir emaw hralh emaw an lo inhuam tawh a, mahse left-back thar an lakluh theih tak loh avangin an chelh leh rih ta zawk a ni. Tunah erawh Daily Mail-in a tarlan danin, January thla transfer bazar inhawng turah hian club hi a chhuahsan a rinawm ta hle a ni.

Nipui liam ta khan Burnley pawhin he rawlthar hi lakluh an lo tum ve hman a, mahse inbiakna an chhunzawm ta lo a nih kha. Tlarhnungah hliam nei an tam chung pawhin Amass hian first team-ah inkhelh theihna hunṭha a chang tlem em em a. Carabao Cup third round-ah mahni mualah Brighton laka 3-2 a an tlawm a, inelna aṭanga an tlak tak bawk si avangin a khelh theihna hun a tlem zual ta bawk a ni.

Chutih rualin Championship club 12 dawn laiin he England tlangval hi an ngaihven nia hriat a ni. Kum 2023 khan Watford academy aṭangin United hi a zawm a, season liam ta khan Sheffield Wednesday lamah loan-in hun ṭha tak a hmang a, match 21 inlanin goal khat a khung bakah assist vawi khat a nei bawk a ni.

Kum 2027 tir lamah he rawlthar hian Old Trafford a chhuahsan mai beiseina a lian chho hle chungin, Carrick chuan first-team kawngka a la inhawng reng tih erawh a sawi lang thung.

2024-25 Jimmy Murphy Young Player of the Year lawmman dawngtu Amass hian hunṭha a chang chho dawn em tih an zawhna chu chhangin Carrick chuan, "Ngei mai le. Chumi vang tak chuan alawm Harry pawh hi kan hnenah a awm. Inkhel tur hian a inpeih reng a, engtik hunah emaw chuan player naupangte hian hunṭha an mamawh ṭhin a, hun remchang tak zawn chhuah a ngai ṭhin a ni. A chang chuan mi dang laka vanduaina thleng (hliam) vang a ni ṭhin a, a chang chuan nangmah i khelh ṭhat em avanga hunṭha pe ngei ngei tur che a kan ngaih vang a ni bawk ṭhin," tiin a sawi.

Carrick chuan sawi chhunzawmin, "Player naupang zawng zawngte hi dinhmun inang renga ding an ni a. Team-ah hmun chang a, match bul ṭan thei tura hma sawn tum mek hi pali, panga emaw paruk vel lai an awm a, Harry pawh hi chung ho zingah chuan a tel ngei a ni," tiin a sawi bawk a ni.