Manchester United manager hlui Erik ten Hag chuan Old Trafford-a an hun hman liam tak chungchanga Kobbie Mainoo-a fakna thu a dawn hnuah a nuih a za hle. Kum 56 mi Dutch coach hian Manchester United a enkawl chhung chanchin an sawi apiangin sawiselna dawn a lo ngaiṭhang tawh hle a ni.
Ten Hag hi 2022-23 season inṭan hma khan Manchester United-in an dinhmun ropui tak hmuh let leh tumin an ruat a. A lo luh hma chiah season khan United chuan Raphael Varane leh Jadon Sancho te man to takin an lo lalut tawh a, Cristiano Ronaldo pawh Old Trafford-ah hian an ko kir tawh bawk a, mahse Champions League khel phak lovin an season an khar a nih kha. Ajax boss hlui Ten Hag hian kum hnih leh a chanve dawn club a enkawl chhungin nomawi pahnih a chawi a; a season hmasa berah League Cup la nghalin, kum 2024 khan FA Cup final-ah Manchester City hnehin nomawi an chawi leh bawk. Chutih rualin a hun chhung hian Cristiano Ronaldo leh Jadon Sancho te nena an inkar buaina lian tak chuan chanchinbu hmai a luah hneh hle a ni.
Ten Hag hian tun hnaiah Ronaldo-a thusawi chu a chhang let a, Portuguese forward hian November 2022-a an contract tihtawp a nih hmain he manager hi a zah loh thu a lo sawi a nih kha. Ronaldo chauh lo pawhin Ten Hag hi an lo sawisel tawh ṭhin a, mahse Mainoo erawh chuan a hnuaia a hun hman chu hriatreng tlak tak a nih thu a sawi thung a, hei hian Dutch coach rilru a tihlim hle a ni.
Amazon Prime tan midfielder ropui Clarence Seedorf-a'n a kawmnaah Mainoo chuan, "Kum 16, 17 mi ka nih lai khan, first team ho nen nitin kan training ho ṭhin a. Raphael Varane, Casemiro leh Bruno Fernandes te nen inkhelhin, ball speed san zia leh insiamrem tura ṭan lak kha ka buaipui ber a ni. Ka ngaihdan chuan kan training session kha a khirh hle. Erik ten Hag leh Mitchell van der Gaag te an awm lai khan training session a harsa thei em em a. Ka lo tel ve tawhna zinga session ṭha ber berte an ni. Kha'ng session khauh tak leh inelna sang tak khan khami hun lai khan min pui takzet a ni," tiin a sawi.
Mainoo-a'n a chanchin hetianga ṭha zawnga a sawi tih a hriat hian Ten Hag chu a nui hawk a, he academy chhuak tlangval theihna chu a fak let ve nghal bawk. Ten Hag hian January 2023 khan kum tling lo Mainoo hi United senior team tan a vawikhat nan a khelmual tir a, a season hnihnaah phei chuan midfielder pawimawh berte zinga mi a ni chho zui ta reng a ni.
The Athletic hnenah Ten Hag chuan, "Kobbie hi ka tan chuan a danglam bik em em a ni. Mi tam takin amah hi an pui a, an chhawmdawl bawk a. Mahse a tawpah chuan, a theihna hmangin amahin a rawn inhlangkai a ni," tiin a sawi.
Training-a Mainoo laka a thil phut chungchang sawi zelin Ten Hag chuan, "Second team tana a khelh lai ka hmuh hmasak ber khan, 'Aw le, he nau hi theihna nei ṭha tak a ni' tiin ka ngaihtuah a. Mahse a la muangchang mah mah a ni. Khelmualah tha thahna (intensity) sang zawk a mamawh tih ka hria a. Chuvang chuan chet ran ngaihna (dynamics) hrang hrang hmanga inelna hmachhawntir turin kan drills-ah kan senglut ta a ni," tiin a sawi belh bawk.
Ten Hag leh Mainoo te inkara inzah tawnna awm hi Cristiano Ronaldo nena an inkar nen chuan inpersan tak a ni. United boss hlui hian Ronaldo chu training-ah a thawkrim tawk lo tiin a sawi a, hei hian an inkar boruak ti chhiain a tawpah Old Trafford-a Ronaldo-a hun hman vawihnihna chu a tihtawp phah ta a ni. Piers Morgan Uncensored-a an kawmnaah Ronaldo chuan, "Ani chu ka zah lo, a chhan chu ka chungah zahna a lantir bik tlat lo a ni," tiin Ten Hag-a chungchang hi a lo sawi tawh bawk.
Ronaldo chauh hi Ten Hag-a enkawl laia lungawi lo a ni lo. September 2023 khan Arsenal an hmachhawn tur matchday squad aṭangin Jadon Sancho chu hlamchhiah a ni a, Ten Hag chuan training-a a chet ṭhat tawk loh vang a nih thu a sawi a. Hemi hnu hian England winger chuan social media-ah thuchhuah siamin hun rei tak chhung "mawhphurtua puh chhan (scapegoat)" a nih tawh thu a sawi chhuak ve leh a ni. Hemi avang hian Sancho hi first team aṭanga hrem a nih hnuah, January 2024 khan Borussia Dortmund lamah loan-in a chhuak zui ta hial a ni.
