Manchester United-in an leiba neih sa an tihpun belh leh tak avangin an sum dinhmun chu a chhe zual hle tih report thar chuan a tarlang.

Tun kar tir lam khan United chuan an sum dinhmun report (financial results) hnuhnung ber chu tichhuakin, a zawnin kum sarih chhung zet sum an hloh (loss) tawh thu an nemnghet a. Kum 2019 aṭanga an sum hloh tawh zawng zawng belhkhawm phei chu £444 million lai a tling tawh a ni.

2025/26 season chhung khan net loss £43 million an nei a, hei hi a hma kum 12 chhunga £33 million an hloh ai khan a pung nasa hle. Kum khat chhunga an sum lakluh zawng zawng (revenue) chu record siamin £677.6 million (zaa 1.7-a pung) tling mah se, Sir Jim Ratcliffe-a hnuaia sum renchem nana hnathawk za tam tak an ban chung pawhin United sum hloh hi a la tawp thei lo a ni.

Red Devils-te hlawh pek zat (wage bill) chu zaa 3.6-in tlahniamin £301 million a ni a, hei hi Premier League financial dan bawhchhiatna vawi 114 laia thiam loh chantir Manchester City aia £100 million chuanga tlem a ni bawk.

BBC-in a tarlan danin, club thuchhuah aṭanga a lan chian lehzual dan chuan June 30 hnu lam khan United hian leiba belhchhahin £90 million dang an puk belh leh a ni. Kumin nipui transfer bazar chhung khan Andrey Santos, Youri Tielemans leh Carlos Baleba te chu a vaiin £153 million sengin an lalut a. Mahse, record hrang hrang aṭanga a lan danin kumin nipuiah hian player thar lak nan £191.7 million lai an hmang niin a lang a, sum dang zawng hi khawi laiah nge an hman tih erawh a chiang chiah lo thung. Hemi chungchangah hian BBC chuan United hotute chu an ngaihdan zawtin an be tawh a ni.

BBC journalist Simon Stone chuan, "£90 million puk belh a nihna nemnghettu hi Ningani khan New York Stock Exchange lehkha thehluhah ziah tel a ni a, Nilainia June 30 thlenga an 2025-26 sum dinhmun an tihchhuah hnuah an leiba zawng zawng chu £1 billion aia tam a la ni reng tih a pholang a ni. United chuan an credit limit aṭangin July 29, July 31 leh August 28 khan ṭum thum sum an la chhuak a, a vaiin £120 million a tling. Hemi hnu September 21 khan £30 million an rul leh a ni," tiin a ziak.

England-a champion vawi 20 ni tawh United leiba neih zat chu £1.15 billion zetah a chho ta a ni. He leiba hi kum 2005-a Glazer chhungkaw leina aṭanga an leiba hlun (£578 million), revolving credit facility ba la bang (£200 million) leh player transfer man ba la rulh loh (£375 million) te belhkhawm a ni.

Tun hnai maia player an lakna man tam zawk hi "kum nga chhungin rulh zawh a ngai dawn" nia sawi a ni bawk. Hetiang dinhmun a nih tak si avang hian, Ratcliffe-a'n United chu tunah chuan "khawvela club hlawk ber" an nih thu a lo sawi tawh chu he thil thleng thar hian awmze nei lovah a chhuah ta a ni.