Manchester United captain Bruno Fernandes chu tun season Premier League-ah Manchester United tan a inlan kim deuh vek a, mahse ram tana chawlhkar hman zawh takah khan hliam tenau a neih avangin Portugal match pakhat chu a hmaih a ni.

Portugal boss Jorge Jesus chuan Fernandes hian Manchester United-a a awm lai aṭang tawhin hliam tuar chungin inkhel a hmachhawn ṭhin niin a lo sawi tawh bawk a. Champions League-a Atletico Madrid an hmachhawn hmaa press conference an neihah United head coach Michael Carrick chuan an captain dinhmun hi a rawn sawifiah ta a ni.

Carrick chuan player a nih lai pawhin taksa vawduai leh hliam tenau tuar chunga inkhelh chu thil thleng fo a nih thu sawiin, Fernandes-a dinhmun pawh a ngaihtuahawm lutuk loh thu a sawi.

Carrick chuan, "A taksain harsatna [hliam] a pai deuh reng a ni. Hetiang hi a thleng fo ṭhin a, mipui hian an hrethiam lo fo ṭhin. Keipawh ka khelh ve thin lai khan ka match khelh zinga zaa 80 (80%) vel kha chu taksa lama harsatna nei chungin ka khel ṭhin a ni. Chutiang chu a nih dan tlangpui a ni ve hrim hrim," tiin a sawi.

Carrick chuan sawi chhunzawmin, "Tunah chuan a ziaawm thawkhat tawh hle a, thil lian tham leh buaipui ngai a tling tawh lo. Inkhelh hun tur a nghakhlel hle bawk a ni," a ti.

Head coach Carrick-a thusawi aṭang hian Fernandes-a harsatna neih chu a ziaawm chho hle tih hriat theih ni mah se, a hliam hi a dam fel chiah lo tih a lang thei bawk a. Chutih rualin, he Portuguese midfielder hi Atletico Madrid laka Carrick-a starting line-up-ah a inlan chhunzawm leh ngei a rinawm hle.

Mahse ṭhenkhat chuan Fernandes hi chawlhtir ve deuh a ṭha zawk angem tih zawhna an siam ve mek bawk a ni. A chhan pawh tun hnai inkhelah a theihna tak a pholang hleithei lova, August thla tawpa Ipswich Town an hmachhawn hnu khan United tan goal emaw assist emaw pakhat mah a la nei leh ta miah lo a ni.

An squad-ah Mason Mount pawh chhawr theihin a inpeih reng a. Mount hian tun hnaiah Fernandes aia goal khung hnuhnung zawk niin, tun season-a bul a ṭan vawikhatna, Brighton laka an tlawm ṭum khan United tan goal a lo khung tawh a ni. Chuvang chuan Carrick hian an captain hi hahchawlhtirin Mount a hmang zawk dawn nge, captain Fernandes bawk bul a ṭantir dawn tih chu inkhelh hunah a chiang dawn a ni.