Kar liam ta kar tawpah Denmark tana a khelh laia Patrick Dorgu-a'n a malpui hnung (hamstring) dawm chunga khelmual a chhuahsan lai hmuhnawm loh tak khan Manchester khawpuiah ngaihṭhatlohna lian tak a chawk tho a ni.
Wales nena an inkhelh ṭumin, match ṭan aṭanga darkar chanve (minute 30) chauh a la liam tihin kum 21 mi Dorgu hi a inhliam avangin lakchhuah a ngai a, a dinhmun a ṭhat tawk loh avangin enfiahna (assessment) nei turin Manchester United lamah a kir leh nghal a ngai ta a ni.
He Denmark international hian January thla khan a hamstring a lo tihliam tawh a, thla thum ngawt khelmual a chhuahsan phah a nih kha. Hetiang dinhmun a tawk nawn leh a nih chuan head coach Michael Carrick-a tan buaina lian tak a tling dawn a, a chhan chu an defender senior Luke Shaw hian chawlkar khatah match hnih a khel zawn thei meuh lo tih Carrick hian a hre chiang hle a ni.
International break hmaa Fulham an hmachhawn ṭum khan Shaw hi match thum a chawlh hnuah a rawn inlan leh chauh a, mahse ram tana inelna a zawh meuh chuan Premier League leh inelna dang match-te a rawn inlar zut dawn avangin player inthlak kual (rotation) neih ngei a ngai dawn a ni. Shaw-a awm loh chhung khan Dorgu hian a hmun hi a lo luahsak ṭhin a nih kha.
Dorgu hi hun eng emaw chen a chawlh a ngai dawn a nih chuan, Carrick hian Shaw-a hmunruak luah turin Diogo Dalot, Noussair Mazraoui emaw rawlthar Harry Amass te lam a hawi a ngai tawh dawn a, hei hi thil duhawm zawk zawk a ni lo.
Chutih laiin, Thawhlehnia Morocco leh Lesotho inkhelhah defender Noussair Mazraoui pawh minute 69-naah hliam vang bawkin khelmual aṭanga lakchhuah a ni lehzel a. Mazraoui-a lakchhuah hi fimkhur thila tih a nih theih rualin, Dorgu erawh match eng emaw zat a inlan theih dawn loh hmel hle a, hei hian nipui transfer bazar lai khan Carrick-a tana left-back lak belh a nih loh man an tuar mek tih a tilang chiang hle.
Midfield thuam chak hnuah United hian left-back thar lakluh hi an tum hle a, mahse season khat chhunga match 60 chuang khelh theihna inelnaah Shaw chu match tin bul a ṭantir theih dawn loh tih hre reng chungin, transfer window chhung khan left-back thar pakhat mah an la ta lo a ni.
Newcastle defender Lewis Hall chu an duh ber ni mah se, Newcastle hian he England international hi hralh an remti a nih pawhin, United-in an thehchhuah ngam tur chin aiin a man an chhiar to dawn hrim hrim a. Hall-a man hi £70m bawr vel tura ngaih a nih laiin, ani lah chuan St James' Park-ah kum 2031 thleng daih tur contract thar a ziak zui ta bawk.
Hall lak theih a nih loh hnu khan United hian a tlawm zawk, bul ṭan nghal lo pawha a ṭul huna hmunruak luah thei tur player an lak a ngai a ni. Tun season inṭan aṭanga chawlhkar thumna lekah Shaw a inhliam nghal kha thil beisei lawk theih a ni a, Dorgu a inhliam leh phei chuan squad-ah tlarhnung veilam a kawruak dawn tih chu mitin hmuh theih a ni reng a ni.
Mahse transfer bazar-ah duhthusam an hmuh loh avangin United hian sum an vawng ṭha ta zawk a. Racing Santander left-back Jorge Salinas chuan £15million release clause nei mah se, United hian an ngaihven zui ta chuang lo. He dinhmunah hian United scout-te leh data department-te hian duhthlan tur dang man tlawm zawk an zawng chhuak thei reng a ni.
United thutlukna siamtute chuan Shaw leh Dorgu te hi an hrisel tawk ang tiin beiseina an nghat a, mahse Shaw-a hliam neih zung zung theih zia chu hai rual a ni lova, Dorgu lah thla kua chhungin a vawihnih nan a hamstring a tihliam leh ta si a ni. Director of football Jason Wilcox leh recruitment team dangte chu he thil thleng avang hian an mangang hle tawh ngei ang. Carrick hian tun season-ah tihsual ṭhenkhat nei ve bawk mah se, nipui bazar lai khan an club lamin an ṭanpui tawk lo hle tih chu a chiang reng a ni.
