Borussia Dortmund left-back Daniel Svensson chuan Premier League club-te nen insawn tur chungchanga sawizawm a nihna chu thil nghet tak (concrete) a awm loh thu sawiin, German club-a a awm chhunzawm zel a pawi loh thu a sawi.

Kum 24 mi Swedish defender hian SVT Sport hnenah thuthang chungchang hi sawiin, news-a an ziak bak engmah a hriat loh thu leh Dortmund-ah a hlim em em thu a phunchhuahpui a ni. Svensson-a'n heng thu a sawi hi Manchester United-in hun rei tak chhunga left-back tur an ngaihtuah mek lai a ni bawk.

Svensson chuan, "Nghet takin inbiakna a awm lo a, chanchinbu-a an ziak bak a aia thui ka hria a awm lo. Dortmund-a hun hman hi nuam ka ti a, hetaha ka khualzinna chhunzawm zel hi ka nghakhlel a ni," tiin a sawi.

Kum 2024 nipui khan Nordsjælland aṭangin loan-in Dortmund hian Svensson hi an lalut a, a hnuah a nghetin an lei zui ta a ni. Season liam ta khan inelna hrang hrangah match 45 inlanin goal 4 a khung a, midang pet luh tur (assist) vawi 2 a siamsak bawk. Tun season-ah pawh bul ṭan vawi 7 inlan tawhin goal 1 leh assist 1 a nei tawh a, German club-ah hian kum 2029 thleng contract a nei mek a ni. SVT Sport-in zawhna an zawhah Arsenal leh Liverpool hmingte zawh ni mah se, a thusawi hian United-in an ngaihven nia sawi a nihna pawh a tichiang hle a ni.

Manchester United hian transfer window liam ta khan left-back thar an la luh ta lo a. Lewis Hall, Alejandro Balde leh David Raum-te pawh an lo ngaihven tawh a nih kha. Newcastle United nena contract thar ziak leh ta Lewis Hall hi United-in an lak luh duh ber (priority target) a la ni fan a, mahse Newcastle-in contract thar an ziahpui avangin lak luh hi a harsa chho deuh dawn a ni. Chutih rualin January transfer-ah Balde lak luh theihna hi a awm ve reng bawk a, Tyrick Mitchell leh Svensson-a te pawh an target-ah an tel ve mek bawk.

Luke Shaw-a contract dinhmun leh tlarhnung thuam ṭhat tura an ruahmanna thlirin, United hian kum 2027-ah left-back kawngah sum engemaw zat invest a, player lak luh thar an ruahman nia report a ni.

Tun dinhmunah Svensson-a'n Dortmund chhuahsan hmanhmawhna a nei lo tih a chiang hle a. Old Trafford-a a phei theihna tur chu United ruahmanna te, Dortmund dinhmun leh he player rilru inthlak leh thut dan azirin thil a kal chho ang.