Season bul ṭan ṭha lo tak nei Manchester United-ah boruak a ṭha lo hle a. Premier League match ngaa point panga chauh hmu a, Carabao Cup aṭanga an chhuah fel tawh avangin, season ṭan tira beiseina zozai awm zawng zawng pawh a bo vek tawh a ni.
Michael Carrick-a hnuaiah season liam taa an chet ṭhatna kha honeymoon period chauh a lo ni zawk em tih zawhna rawn chhuakin, Carrick-a hma hun chungchangah zawhna a rawn piang ta a ni. Carrick-a dinhmun a derthawng chho mek tairah, fan-te chuan Antonio Conte leh club hotute an inbe tawh nia hriatna an nei tlat a ni.
Italy club Napoli aṭanga a chhuah hnuah Conte hi hna nei lovin a la awm mek a, Napoli-ah hian Serie A title chawipuiin Scott McTominay-a theihna pawh a phawrh chhuak ṭha hle a nih kha. Premier League-ah Chelsea a lo champion-pui tawh bakah club sang tak tak enkawltu a lo ni tawh a, a hotu nihna thinchhia leh chet chhuah thut ṭhin mizia hian club ṭhenkhat tana hlauhawmna siam mah se, league nomawi chawipui thei a nihna erawh phat rual a ni lo. Old Trafford fan-te tan chuan Premier League title nomawi rawn chawipui leh thei a nih chuan, chutiang boruak chu an hreh hauh lo ang.
The Athletic hnenah Conte-a'n thu a sawinaah, a hna thar tura a duh ber chu club lian lo tlaktawm tawhte dinhmun siamṭhat leh a nih thu a sawi. Conte chuan, "An chanchin leh rohlu hrezut tawh lo club tam tak an awm a. Heng club zinga pakhat hi pan a, an chanchin ropui takte sawi thar leha entir nawn leh ka duh a ni," tiin a sawi.
Conte-a thusawi hian chanchinbu hmai a luah takah chuan, Manchester United fan-te chuan Old Trafford lamin ruahmanna a ruka an nei tawh a nih an ring tlat a ni. Fans ṭhenkhat chuan social media lamah an ngaihdan tarlangin, fan pakhat chuan, "Conte hian Manchester United chanchin chiang takin a sawi a ni a, a postcode chiah a telh lo a ni," a ti a, mi dang pakhat pawhin, "United-in Carrick an ban hun a nghak mek a ni," tiin a sawi.
Fan dang pakhat chuan, "Manchester United chungchang a sawi chiang a ni. United job hi a chak ber a ni," a ti a, mi dang leh chuan, "United chungchang a sawi a ni 100%. An inbe tawh hrim hrim, hei hi Carrick-a tan chuan fimkhur a ngaih tluangna tur a ni," tiin an sawi. Fan pakhat phei chuan, "A inṭan ta. November thlaah hian Manchester United-ah a rawn kal dawn a ni," tiin lawm takin a tarlang hial bawk.
Hemi rual hian rilru fim taka thil thlir duhtu fan pakhat erawh chuan Conte hi United job laka hla taka awm turin a chah thung a, "United hna hi la hauh suh, Antonio. Chanchin ropui vawmlut turin i rawn kal ang a, chumi hnuah chu chanchin aizuk zinga pakhat i rawn ni ve mai ang," tiin he club-a manager-te tlu chhe ṭhin chu a rawn sawichhuak a ni.
Tun dinhmunah chuan Carrick-a kutah thil engkim a la awm a, mahse hmachhawn tur match khirh tak tak a neih chhoh dawn avangin, Conte leh manager dangte thla hliap laka inthiarfihlim tur chuan match leh tura United hi hnehna a chanpui ngei a ngai dawn a ni.
