Manchester United chuan Craven Cottage-ah Fulham an tlawh ṭumin point khat hlawhchhuakin an lungawi a ngai ta hram a ni.
Red Devils hi a zawnin match thum ngawt an tlawm dawn nia a lan hnuah, hun tawp dawn lamah Matheus Cunha chuan goal pawimawh tak khungin an siphurh a rawn sut hram a. Mikhual team United hi an che muang hle a, Cottagers lamin tharum leh tlan peih lamah an khum chiang hle a ni. Tun season-a squad fitness dinhmun chhiat zia chu hai rual a ni lo.
Match zawhah Brazilian attacker Cunha chuan fitness lama an tlakchhiat thu hi a pawm laiin, Michael Carrick erawh chuan a pawmpui chiah lo nia a lan avangin, INEOS lamin coach thlak an rilruk mek pawh hi a mak lem lo a ni.
First-half ah United hian chance ṭha tak tak an nei teuh a, vawi hnih ngawt goal ban an pet per hman a ni. Mahse tlarhma lamin chance ṭha an hlah nual a, tlarhnung lamin team an tichhe chhunzawm bawk.
Inkhelh zawhah MUTV-in an kawmnaah, kum 20 chhung zet league title lo la tawh United chu second-half ah an ṭha tawk lo hle tih Harry Maguire chuan a tarlang a ni.
"Chance kan neih hi kan hmang ṭangkai tur a ni a, kan hun ṭhate kan bawhpelh tur a ni lo. Premier League-ah khualmuala inkhelh a harsat zia chu kumin results aṭang pawh hian a lang chiang reng a ni. Premier League team tin mai hi an chak ṭha em em vek tawh a, player ṭha tak tak neiin an inremkhawm ṭha hle bawk.
"First-half-a hunṭha kan neih kha hun pawimawh tak tak a ni a. Premier League-ah khualmuala hetiang hunṭha i nei a nih chuan, i hmang ṭangkai ngei ngei tur a ni.
"Chuvangin inkhel kha a inpeptawn hle a, first-half-ah khan kan hunṭha kan bawhzui a ngai a ni. Second-half bul kan ṭan dan a ṭha tawk lo a, mahse chance hlauhawm lutuk an neih loh laiin box chhung erawh kan veng nghet thawkhat hle chuan ka hria. Mahse goal kan chhuah ta thut kha chu a vanduaithlak takzet a ni," tiin a sawi.
Captain hlui Maguire hian hun tawp lama team beihlet dan erawh a fak hle a:
"Mahse kar liam ta lakah chuan kan chetlet dan kha a letling hlauhin a ṭha zawk a ni. Kha kar harsa tak kan hman liam hnu leh hnufual zawk kan nih hnuah, kan naupangte hian rilru paukhauh leh ṭhahnemngaihna ropui tak an lantir a ni.
"Goal kan chhuah hnu khan kan nawrlet nghal char char a, kan nawrna kha a tawp lo a ni. Ball min tlaksak emaw, kan lama per a goal chhung luh emaw kha kan mamawh a, chu chu a thleng ta ngei bawk a ni. A hma deuhva a lut lo kha a pawi zawk a, a chhan chu chak thei tura momentum ṭha tak kan neih lai a ni si a," a ti bawk.
Centre-back Maguire hian squad chhungrila harsatna awmte phawrh kher lovin thil a sawi tluang thei hle a. Pathianni inkhel zawhah pawh United chu dinhmun chhe lutukah an awm loh thu leh match tam zawkah an vanneih loh vang mai niin a sawi a ni.
"Helai hmuna kan awm hian thawm a tam reng ṭhin a. Chuvangin a hmasa berah chuan pawn lam thawm bengchheng hi kan ngaihthah a ngai a ni. Kumin chhung hian eng nge kan tih a, eng lai ber nge kan siamṭhat a kan ṭan lakna tur tih chauh hi kan ngaihtuah tur a ni.
"Mahse kan dinhmun aṭang hian kan hla lo hle a ni. Ka sawi awmzia chu, kar liam ta khan goal awmze nei lo lutuk avangin inkhelh pumpui a danglam phah vek a. A hma karah pawh right-back-in yard 30 aṭangin mawi takin ball a chhuih lut a, chu chu ni lo se thil hi dang takin kan thlir mek maithei a ni. Football chu a nihna takah chuan hetiang hi a ni a, a inhlat lo hle ṭhin," tiin a sawi.
United player-te hi ram tana inlan turin an chhuak dawn a, INEOS hotute hian he buaina chinfel nan hian chawlhkar thum ngawt hun an nei dawn a ni.
