Manchester United chuan Liverpool aṭangin forward theihna ngah tak Isaac Konde chu an lalut fel ta a, hei hian kumin nipui chhunga an academy tana player an lakkhawmna chu a khar fel ta bawk a ni.

Kum 16 mi Konde hian Liverpool lamin scholarship ziahpui an tumna chu hnawlin, Old Trafford lama insawn hi a thlang zawk a ni. He forward naupang hi tlarhma veilam, laili leh dinglamah te pawh khel thei vek a ni a, September thlaa international break neih zawh hnu hian Darren Fletcher-a enkawl Under-18 team tan inlan theihna hun remchang a nei ṭan dawn a ni.

He transfer chungchangah hian Manchester United chuan thuchhuah siamin: "Manchester United chuan winger Isaac Konde lakluh chu an inrempui ta. He naupang theihna nei ṭha tak hian Liverpool a chhuahsan hnuah kan club a rawn zawm a ni. Kum 16 mi hian Liverpool-ah Under-18 football a lo tem tawh a, 2025-26 campaign tawp lamah khan a inlan zing hle bawk. Club-a mi zawng zawngte chuan Isaac hi United-ah kan lo lawm a, duhsakna sang ber kan hlan a ni," tiin an puangzar a ni.

Konde bakah hian United chuan an hmelma lian Manchester City aṭangin Karim Cassim (kum 17) leh David Eze (kum 16) te pawh an lo lalut tawh bawk a ni. He naupang pahnih pawh hian Fletcher-a U18 team hi an zawm dawn a, Fletcher-a naute hi tun dinhmunah Premier League North-ah pathumna dinhmun luah mekin, hmahruaitu City lakah point rukin an hnufual mek a ni.

Academy ngaihventute chuan tun season FA Youth Cup khelh hunah heng rawlthar pathumte hi khelmualah an hmuh theih ngei beisei a ni. Fletcher hian squad ṭha tak a nei mek a, Kai Rooney leh Jayce Carrick te pawhin hmalam pan zelin an theihna an pholang chho mek bawk a; City leh Liverpool aṭanga player thar rawn luh belh hian a thlan tur squad a ti-chhah lehzual hle dawn a ni.

United hian player naupang theihna nei ṭhate chawisanna kawngah hian an player thar puanzar dan phung pawh an thlak danglam deuh a, player naupangte leh an chhungkaw tan inziahluh ni (signing day)-ah hian "tawnhriat ṭha zawk leh nuam zawk" siamsak an duh thu thudawnnate chuan an tarlang a ni.

Heng player lak tharte hian Old Trafford tlawhkualna hun ṭha an dawng a, club chanchin leh thil lo thleng tawhte, academy-in hmun pawimawh a luah dan leh tunlai khawvela a inzawm chhoh dan te an hriatthiam theih nan zirtir an nih bakah, club blazer hlan vek an ni bawk a ni.