Carrington-a Manchester United inenkawlna hmun (treatment room) chu tun season chhung hian a lun hle a, mahse United tana hlauhthawnawm ber zawk chu player la chawl miah lo Bruno Fernandes-a dinhmun hi a ni maithei.

Matthijs de Ligt, Luke Shaw, Carlos Baleba, Mason Mount, Amad leh Benjamin Sesko te chuan hliam harsatna an lo nei tawh hlawm a, ram tana a khelh laiin Patrick Dorgu pawhin hamstring hliam a neih belh leh bawk a ni. Chutih laiin, an captain Bruno Fernandes erawh a pangngai angin a la inlan reng thung. Tun season-ah match sarih chauh la khel mah se, Fernandes hian Michael Carrick-a squad-ah minute 558 khel tawhin, minute khel hnem ber a ni leh mek tawh a ni. Season liam ta khan minute khel hnem ber pahnihna a ni a, a hma season-ah pakhatna, 2023-24 ah pathumna, leh 2021-22 leh 2022-23 ah te khan pahnihna a lo ni tawh bawk. United hian Fernandes hi an rinchhan hle tih a lang chiang hle a ni.

Fernandes-a tel lova United dinhmun tur hi kum sarih liam ta chhung khan manager-te'n an ngaihtuah a ngai ngai lo. Mahse, tunah hian Carrick-a tan chuan Fernandes-a chawlh hi thil thleng thei hlauhawm ber a ni mek thung. He midfielder hi a khel ṭha tawk lo hle tih ram tana chawlh an neih hma khan a hriat theih a, a chhan pawh hliam tuar chunga a lo khelh char char vang a ni.

Portugal boss Jorge Jesus chuan, "He na hi match thum vel chhung chu a lo tuar tawh tih a sawi a, hei hi Wales laka a khelh ṭhat tawk loh chhan pakhat pawh a ni," tiin a sawi. Jesus hian Norway lakah Fernandes hi a chawlhtir a, United medical staff-te pawhin Portugal lam hi an be pawp reng a ni.

Jesus-a sawi "match thum vel" hian Manchester City, Brighton leh Fulham laka an khelh kha a huam a. United pawhin City leh Fulham laka a khelh theih nan hian theihtawp a chhuah tih an sawi. Champions League-a Sabah nena an inkhelh ṭum khan Fernandes hian hliam a lo tuar tawh nia hriat a ni a, stadium a chhuahsan lai pawhin a ke a tihnâ tih a hriat hle. Half-time-ah 3-0 in hma hruai tawh mah se, Carrick-a'n minute 90 chhung a khelhtir tlat kha mak tih a hlawh hle a ni.

Hemi chungchang an zawhna chu Carrick chuan chhangin, "Substitute player panga chauh kan kawl a. Thutlukna ṭhenkhat siam a ngai a ni. Mahse, midang ang tho a ni a, a khel hnem tawh hle tih chu a hriat a, squad hi kawng hrang hranga kan inthuam chhoh mek avangin kan la siamrem chho zel ang. Zanin kha chu thutlukna siam ngai a nih avangin khelmualah a awm tlang ta a ni," tiin a sawi.

He thutlukna hi Carrick hian a la inchhirpui maithei a ni. Tunah chuan United hian a fitness hi an vawng ṭha hram hram a, Portugal camp-ah la awmin Denmark leh Norway lakah a inlan leh thei tura beisei a ni. Fernandes hi a theihna zaa 80 chauh phochhuak thei pawh nise, United tan chuan a pawi hle dawn a, a chawlh phei chuan Carrick tan lu na lian tak a ni ang. Matheus Cunha leh Mount te chu a thlaktu tur rintlak ni mah se, Fernandes-a sulhnu leh record erawh tluk pha an awm lo a ni.