Craven Cottage-a 1-1 a Fulham nena an inhnehtawk hnuah, Gary Neville chuan Manchester United khelh dan leh an thawhrim tawk loh chu na takin a sawisel nawn leh a, "zahthlak tak" leh "beisei a phak lo lutuk" tiin a sawi.

Pathianni inkhelah khan minute 63-naah Lisandro Martinez-a'n anmahni lamah goal a thun (own goal) palh avangin Fulham-in hma an hruai a, mahse Matheus Cunha chuan an siphurh a sut sak leh hlauh a, United hian point khat an hlawhchhuak hram a ni. Chuti chung chuan second half ṭantirha United khelh zawi lutuk leh khelmuala an tlan ṭhat duh loh dan chuan Neville-a thin a tirim hle a ni.

Sky Sports-a co-commentary neitu Neville chuan Fulham-in ball an in-pass kual vel laia Carrick-a naute khelmuala an tlan peih lo lutuk chu a sawisel a. Carrick-a'n khelmuala a naute tha thawh leh nawrna (pressing) ah a lungawi thu a sawi chu dik lo a tih thu sawiin, "Khelmuala an kal mai mai kha ka sawi a ni. Manchester United team ball an chan loh laia hetianga khelmuala kal kual mai mai hi ka la hmu ngai lo. Michael-a'n team tha thawh danah a lungawi thu a sawi a, mahse Michael-a hian player-te ṭan zawnga ṭawng hi a bansan a ngai a ni. Engvanga ṭan nge a nih chu ka hrethiam, a rinawm a, a player-te chu a tana thawk tura a duh vang a ni a, season pawh a la thui hle tih a hriat reng mai," a ti.

Inkhelh muan dan sawi zuiin Neville chuan, "Team pahnihte hi an inang reng a, 'milim' (mannequins) tiin ka ko hial a ni. Anni kha milim ang mai an ni.

"Minute 15 chhung zet ball chan loh laia hetianga Man United team kal vel mai mai hi ka la hmu ngai lo. Harhvangna leh inrinna reng a awm lo. Player chu engtik lai pawhin inpeih reng a, yard hnih thum vela che sawn zung zung tur a ni a. Mahse Fulham-in ball an chan lai khan an kal vel mai mai a ni. Fulham khan chance an neih hmain inkhel ṭan tirh teah pass 46 lai an nei hman a ni. International break a awm tur hi a hun tak a ni a, inrintawkna leh thil nihphung siamrem a ngai a ni," tiin a sawi.

United khelh dan a sawiselna tlipnaah Neville chuan: "Team pakhat an thawkrim lo emaw, tha an thawh tawk lo tiha sawisel hi ka ti khat khawp mai. Chu chu player-ho laka sawiselna lian ber a tling a ni.

"Hetianga sawi hi ka fimkhur ṭhin hle a, mahse kha second half minute 15 hmasa leh a tlangpuiin minute 60 chhung khan Man Utd kha an zahthlak takzet a ni. Ball an chan loh lai phei kha chuan a ṭha lo takzet a ni," tiin a sawi zui bawk.

United hian tun season Premier League match nga an khelh tawhah vawi khat chauh hnehna an la chang a, point 15 hmuh theih aṭangin point 5 chiah hlawhchhuakin 12-na dinhmun an luah mek a ni.

Kar thum chhung daih international break an hman zawh hnuah, mualneitu niin table mawngphah chiaha awm Tottenham an lo mikhual ang a, hemi hnu hian Champions League-ah Atletico Madrid chu khualmualah an luhchhuah zui bawk ang.