Manchester United star hlui Alejandro Garnacho chuan international break chhunga mipuite hmuh lohva (behind-closed-doors) Southampton nena friendly match an khelhah Aston Villa tana a goal hmasaber khungin inrintawkna a nei thar ve ta. He winger hian Chelsea aṭanga loan-a Villa Park a pan hnuin hun harsa tak a paltlang chho mek a ni.

Garnacho hian manager Unai Emery-a hnuaiah bul a la ṭan miah lo a, tun season chhungin Premier League-ah substitute aṭangin vawi eng emaw zat lut tawh mah se, minute 31 chauh khelmualah a la inlan a ni. Carabao Cup-a Coventry City laka 3-1 a an chak ṭum khan inkhelhna hmun a chan ngei beisei ni mah se, bench aṭangin a inlan ta chuang lo.

A squad aṭanga a dahchhuah hnuah Emery chuan he rawlthar hnenah hian thuchah chiang tak pein, "Thawhrim chhunzawm zel tur a ni. Thawkrim la, thawkrim la, training ṭha takin nei la, thawkrim rawh. Khelhna minute a neih hunah ṭha taka khelh a tum tur a ni. Hma chu a sawn chho mek a, mahse tun dinhmunah chuan a hmaah player dang an awm rih a ni," tiin a sawi.

Emery-a'n Garnacho-a hmaa a dah player-te zingah hian academy player George Hemming, Ibrahim Mbaye leh Alysson te an tel a, anni hian match hnuhnung lamah hun ṭha an chan laiin Garnacho erawh chuan ṭhutna aṭangin inkhel a thlir a ngai ṭhin a ni.

Season liam taa Liverpool aṭanga Villa-a loan-a lut Harvey Elliott-a tawrh ang kha Garnacho hian a tawng ve mai ang tih hlauhthawnna a awm tawh bawk. Elliott kha Premier League-ah vawi nga chiah a inlan a, vawikhat chiah bul a ṭan a nih kha; a chhan pawh vawi 10 a inlan a nih chuan a ngheta an lakluh ngei ngei a ngaih dawn vang a ni.

Chutiang dinhmun a nih mek laiin, international break chhung khan Garnacho chu club-ah a cham a, Southampton nena friendly match an khelhah inlan theihna hun remchang a nei ta a ni. He winger hian a hun ṭha neih chu chhawr ṭangkaiin match-a goal awmchhun a khung a, hei hian Emery-a ruahmannaa inhlangkai leh thei turin beiseina a pe thar leh ta a ni.

Villa hian season tawpah Garnacho hi a ngheta lei theihna (conditional obligation to buy) an nei a, inremna a puitlin chuan £43million vel sengin an lakluh a ngai dawn a ni. He forward hi nipui liam ta mai khan head coach hlui Ruben Amorim nen an inmil theih loh hnuah £40m-in Manchester United aṭangin Chelsea a lo zawm tawh a nih kha.

Stamford Bridge a pan khan a career a tihnun thar leh beisei a nih laiin, Garnacho hian London khaw thlang lamah theihna a phochhuak thei ta lo a. Chelsea kha Premier League-ah 10-na niin Europe inelna khel turin an tling lova, he winger pawh hian khelhna hmun a chang tlem hle a ni.

Manchester United pawhin Villa Park-a Garnacho-a hmasawn dan hi uluk takin an thlithlai reng dawn a ni. Villa hian Chelsea aṭanga a ngheta lakluhna clause hi an hmang a nih chuan, Stamford Bridge-a a insawn ṭuma zaa 10 (10 per cent sell-on clause) an lo ziah tel avangin Michael Carrick-a naute hian £300,000 vel lai sum an dawn theih phah dawn a ni.