Manchester United defender hlui Patrice Evra chuan kum 2014-a Juventus zawm a tum ṭuma an chief executive hlui Ed Woodward-a'n an inremna bawhchhiaa a contract a lo pawhseisak avanga ankhum leh vau ta hial a nih dan chanchin a sawichhuak.
Kum 2006 khan Evra hi Monaco aṭangin Old Trafford-ah a lut a, United tana match 379 a khelh chhungin Premier League title vawi nga leh Champions League nomawi vawi khat a chawipui a ni. France tan pawh vawi 81 a inlan a ni. Kum 2013-14 season tawp khan a contract a zawh dawn avangin mimal chhan hrang hrang leh a chhungkua zawng zawngin insawn an duh tawh avangin Serie A club lian Juventus zawm turin kum hnih daih contract an lo inrem tawh a, hei hi Woodward-a hnenah pawh a lo hrilh vek tawh a ni.
A tirah chuan Woodward-a hian a chhuah tur hi a pawmpui thlap a, mahse a hnuah thutlukna thlak thutin, contract-a option awm hmangin kum khat dang chelh zui a tum leh ta a ni. Evra chuan May thlaa Dubai-a a piancham pual a hman laiin a agent aṭangin United-in a contract an pawhsei sak thu thuchhuah an siam tih text message a hmu a. "At zui mai ka tihniam a, ka rilru a na takzet a ni," tiin Evra chuan a sawi.
Evra chuan he thil thlen hnua a chet dan sawiin, "Ed-a hi phone-in ka bia a, ka ankhum tawn tawn a, ka vau ta hial a ni. Ani chuan football director hetianga be tu ka nih loh thu leh, min chawitir tur thu a sawi a. Hemi hnu hian Ryan Giggs-a'n min rawn be bawk a, mi pakhat vang mai mai a chhuak lo turin min rawn ngen a. Mahse, he thil hi ka tana chhuahna remchang tak a ni ta zawk a ni. Ka nupui hnenah chhuah kan tum thu ka lo hrilh tawh a, hei hian min namtul ta ber a ni," tiin Sky Sports hnenah kum 2019 khan a lo sawi tawh a ni.
Evra chuan Woodward-a thil tih chhan chu a hriatthiam thu sawi zelin, "Senior player dang Rio Ferdinand leh Nemanja Vidic te hnena an mamawh tawh loh thu an sawi laiin, dressing room-a mize nghet nei mi an mamawh avanga min chelh chhunzawm duh a ni tih ka hrethiam. Manager hlui David Moyes-a'n ban a nih hma pawhin chu chu a lo sawi tawh bawk. Ed-a thil tum chu hrethiam mah ila, min bum erawh ka hrethiam thei lo a ni. Min rawn be masaa min hrilhfiah tur a ni," a ti.
Contract pawhsei a nih hnua thla hnih a liamin, kum 33 mi Evra hi £1.2million sengin Juventus chuan an lalut ta tho a. Turin club-ah hian a season hmasa berah Champions League final a thleng leh hial a, mahse Barcelona lakah an tlawm a ni. Evra chuan a nupui mizia chu "a thinrim hi chuan Roy Keane-i a ni mai" tiin fiamthu in a sawi a, Juve nena Champions League vawi thum chawipui pawh nise United tana khelh tluk hlimna a thlen dawn chuang loh thu a sawi lang bawk.
Sir Alex Ferguson-a'n club a chhuahsan hnuah United-in an DNA leh an kalphung (philosophy) an hloh nia a hriat thu sawiin, "Ferguson-a kha chu an zah em em a, a aia lian anga inngai player chu a tichhe nghal mai ṭhin. Player-ten a tan khelh an chak em em ṭhin. David Moyes-a tan pawh theih tawp ka chhuah a, mahse Ferguson-a an zah ang khan an zah dawn lo tih ka hriat avangin thil harsat tur zia ka hre sa a ni," tiin kum 2020 khan The Guardian a hrilh bawk. Juventus-a season thum a hman hnuah Marseille leh West Ham-ah te reilote a khelh hnuin a football career a chawlhsan ta a ni.
