Manchester United chanchin ziaktu lar leh zahhlawh Wayne Barton-a'n Sir Alex Ferguson-a hun lai chanchin ziakin hma a la mek a. He a project thar, Old Trafford-a he Scot manager ropui tak thil lo tih tawhte thuruk leh hriat ngai loh tam tak pholang thei tur hian social media aṭanga thuchah a dawn chuan nasa takin a pui ta a ni.

Barton-a'n a tirah chuan kum 1986 aṭanga 1992 inkar, United-in hlawhtlinna ropui an chan hma hun chauh kha ziah a lo rilruk a. Mahse, a hnuah Ferguson-a hun hman chhung zawng leh an khingpuite ngaihdan thleng tarlang thei turin hma a la chhunzawm leh ta zawk a ni. Hemi hnu hian Facebook-ah hming a hriat ngai loh pakhat aṭangin thuchah a dawng a, chu chuan a lehkhabu thar "Fergie: The Lost Tapes" atan hian Ferguson-a interview lo neih tawh, la tlangzarh ngai loh darkar 400 chuang zet a rawn chhawpchhuahsak ta a ni.

He thuchah rawn thlentu hi Piccadilly Radio journalist hlui leh Manchester Evening News correspondent David Meek-a nena United chanchin lo ziak tawh ṭhin, late Tom Tyrell-a tupa a ni a. Tyrell-a'n United a lo zui ṭhina a thil hnutchhiah ṭhenkhatte chu Barton-a'n a duh ang em tih a rawn zawt a ni.

Barton-a'n he thil thleng chungchang hi sawiin, "Tom-a fanu hi Haworth-a holiday home-ah a awm a. Chutah chuan va kalin eng thil nge a nih ka va en a, a thil khawnkhawmte chu kutziak lehkha te, thlalak leh a negatives te a lo ni a. Entirnan, negatives zingah chuan kum 1968-a European Cup an lak ṭuma parade an neihna thlalak, club lamin an la hmuh ngai loh a tel a, chutah chuan celebrations laia Jimmy Murphy-a thlalak awmchhun nia hriat pawh a tel a ni. Mahse, he collection-a hlu ber chu audio tape te leh minidisk te kha an ni a, a tirah chuan reporter a nih laia a interview lak khawm satliah emaw ka ti a. Mahse ka ngaihthlak chhoh takah chuan kum 1986 aṭanga 2009 thlenga a nitin thil tawn hrang hrang, a bikin The Cliff-a Ferguson-a nena an inbiakna zawng zawng a lo ni reng a ni," tiin a sawi.

Barton-a'n thla 18 chhung zet he cassette tape-a awmte hi ngun takin a ngaithla a, digital-ah a vawng ṭha zui a, a lehkhabu thar atan hian a remkhawm ta a ni. He audio aṭang hian he Scot manager hian chanchinbu ziaktute aiin tualchhung radio reporter hi a lo rinchhan zawk hle tih a hriat theih a, a chhan chu a thusawite kha tihkhawlohsak a nih ve ngai loh vang a ni.

Barton-a'n, "Chanchin hlui (history) ka ngaithla mek a ni a, mahse he cassette tape aṭang hian eng thil ropui nge dawt lehah rawn chhuak dawn tih ka hre lawk ngai lo," tiin a sawi.

He lehkhabuah hian Ferguson-a'n United a enkawl tirh, mipui lamin an la rinhlelh em em laia a hna a kalpui dan chanchin ngaihnawm tak tak a tel a. Old Trafford-ah Queens Park Rangers laka a match hmasaber an khelh hmaa khelmual chhunga mipuite hmaa a thusawi hmasaber pawh Barton-a'n a ngaithla a, he recording awm hi tuman an lo hre ngai lo a ni.

Barton-a'n, "Thil tam tak a awm a, mahse ka tana ngaihnawm ber chu kum 1993-a hlawhtlinna kan chan hma zawng kha a ni. A chhan chu oil tanker lian tak, kawng dik lo lama kal tawh chu kawng dika her let tumtu rilru chhungril i hmu thei tlat a ni. Hei hi United-in kum 10 liam ta chhunga an lo tawn tawh nen a inang hle a. Chuvang chuan tun lai hun nen hian eng nge inzawmna a neih, rilru put hmang (mentality) thila hman ṭangkai tur a awm em tih thlirin ka ngaithla a ni," a ti.

Barton-a'n October 2005 tawp lama Middlesbrough laka 4-1 a an tlawm hnu lawka Ferguson-a interview pawh a tarlang a. Kha mi ni kha Roy Keane-a'n MUTV-ah a team-puite na taka a sawisel ni kha a ni a, chu chuan chawlkar tlemte hnuah club aṭanga a chhuah phah ta a nih kha.

Barton-a'n, "Middlesbrough laka 4-1 a an tlawm hnu khan press conference a nei a, hemi hnu chawlkar hnih lekah Roy Keane chu ban a ni zui a. He press conference-ah hian club chhung thil sawiselna chu pawn lamah chhuak lo turin a sawi nasa hle a ni. United-in result chhia an neih vang chauhva sawi a ang a, mahse a hnu thil thleng aṭanga thlirin, Roy Keane-a laka a thil tih tur kha a lo sawi lawk (breadcrumbing) reng a ni tih a hriat theih. Keane-a chhuah kha a thut thut anga lang mah se, Ferguson-a rilruah chuan a lo awm lawk tawh a ni," tiin a sawi.