Manchester United star hlui Casemiro chuan a mimal eSports sumdawnna Case Esports (Casemiro Sports Brasil SLU) hmangin sum lama hlohna lian tak a tawk mek a, kum hnih chhungin a company hian £1million hnaihchilh an hloh a ni.
Financial statement hnuhnung bera a lan danin, he Brazil midfielder-a video game organization hian 2025 financial year chhung khan €202,374 (£173,903) an hloh a. Hei hi 2024-a an hloh €842,900 (£724,317) tawh nen chhuarkhawmin, he sumdawnna hian kum hnih chhung zawngin €1.05m (£902,280) vel zet an hloh ta a ni.
Case Esports ti a sawi lar ṭhin he organization hian Spain rama an hmalaknate an tihhniam hnuah pawh hetiang taka sum hlohna hi an tawk a. A nihna takah chuan Brazil lam bazarah an rilru zawng zawng an sawrbing theih nan kum 2024 khan Spain-a an sumdawnna phung te chu an lo tihtawp tawh vang a ni.
Spain-a an branch an khar tak avang hian, Case Esports hian 2025 khan operational revenue engmah an nei lo a, hei hi 2024-a €90,345 (£77,634) an lakluh nen phei chuan a inthlau hle. Mahse "other operating income" atan €52,800 (£45,371) chu account-ah hian an ziahlut ve thung a, hei hi 2024 aia let thum aia tam mah ni mah se he sum lo chhuahna tak hi tarlan a ni lo.
Company expenditure hi a sang reng a, hei hi Spain-a staff pahnih an la chhawrh chhunzawm zel vanga hlawh pek (personnel costs) avang a ni. Kum 2025 chhung khan hlawh atan €187,517 (£161,136) an hmang a, hei hi 2024-a staff hlawh €460,172 (£395,432) nen chuan tlem zawk mah se company hmakhua atan a tling lian hle a ni.
Casemiro-a'n he company hi 2020 khan a lo din a, kum khat chhunga an hlawkna leh senso inmen tawk (break even) a lo inbeisei a ni. Mahse Spain-a an operation a tawp meuh chuan a vaia kalsawm chhohva hlohna (cumulative losses) hi €7m (£6m) aia tam a tling hman a, he sum hi Casemiro leh a thawhpuite'n an tum tlut tlut a ngai hial a ni.
Balance sheet-a a lan danin, December 31, 2025 atan Casemiro Sports Brasil SLU total assets hi €1.5m (£1.29m) a ni a, total equity hi €121,540 (£104,441) a ni bawk. Short-term debt erawh €1.5m (£1.29m) aia tam a tling thung.
Sum dawnna lama an tlahniam nasa hle chungin, Casemiro-a tan erawh hei hian lungngaihna lian tak a thlen a rinawm loh. Manchester United-a a awm lai khan chawlhkar khatah £350,000 vel hlawh ṭhin a nih avangin, kumin chhunga an hlohna £174,000 hi chuan a chawlhkar khat hlawh chanve vel chauh a phu a ni.
Kum 2022 khan Real Madrid aṭangin United hi a zawm a, season li chhung Old Trafford-ah awmin match 160-ah goal 26 a khung hman. 2025-26 season tawpah a contract a zawh avangin a chhuak a, Inter Miami a zawm ta a ni. Kum 34 mi hian June 2024 khan Spanish club Marbella FC-ah share a lo lei tawh bawk a ni.
