Manchester United director of football Jason Wilcox leh club hotute chu sawiselna hmachhawn mekin an awm a, tun nipuia Chelsea aṭanga Brazilian midfielder Andrey Santos an lakluhnaah khan a man aia to uchuukin an lei nia ngaih a ni.
United hotute hian Chelsea hnen aṭang hian £50million sengin he Brazilian tlangval hi an lalut a, tun nipui bazara tlar laili thuam nan midfielder an lakluh pathumte zinga mi a ni. Mahse, Premier League club dangte leh Chelsea hnaihtu ṭhenkhat chuan he player hi £25million chauh hu niin an ngai a, an sum hmuh zat zawng zawng achanve (half) chiah a phu nia an ngaih thu The Athletic chuan a tarlang a ni.
United hian tun season inṭan hmain tlar laili thuam chak nan sum an seng hnem hle a, Santos bakah Aston Villa aṭangin Youri Tielemans leh Brighton aṭangin Carlos Baleba te an lalut a, heng inremnate avang hian overall-in £150million chuang lai an seng a ni. A tirah chuan Premier League midfielder rintlak pathum an lalut thei hi fak zui hle mah se, player pathumte hian tun season tir lamah harsatna an hmachhawn tlang hle thung.
Brighton aṭanga rawn zawmtu Baleba hi a kerek hliam nen club hi a rawn zawm a, Champions League-a AS Roma an hneh ṭum khan a hamstring hliam vangin a chhuah a ngai zui a ni. Tielemans pawh Aston Villa-a a awm laia a chaklohna phuhrusaktu an neih ṭhin kha United-ah a lang chhuak ṭan a, head coach Michael Carrick pawh hian Santos hi a duh zawng tak a nih loh hmel hle bawk.
Kum 22 mi Santos hi January 2023 khan Chelsea chuan lalutin match 47 chauh senior-ah a khelh hnuah July thla khan United hi a zawm a. Premier League-a player man tihtona boruak thlirin £50m hi inremna ṭha tak anga lang mah se, Chelsea tan erawh inhlawkna ropui tak a ni thung. United tan erawh player tam zawk lakluh an duh avangin leh squad depth siam a ṭul avangin hemi man zat hi a mawk lo nia ngaihna pawh a awm thung a ni.
Midfielder dang United-in an ngaihven zinga Sandro Tonali leh Mateus Fernandes te chuan Tottenham an pan a, an pahnih man hi £185m a tling. Elliot Anderson pawh Nottingham Forest aṭangin Manchester City-ah £116m-in a insawn a, English player man to ber record thar a siam nghe nghe. United hian player pakhat chauha sum engemaw zat lehtla theihna dinhmun an neih loh avangin player pakhat ṭha tak aia player engemaw zat lakluh zawk kha an ruahmanna a ni.
Pathiannia Aston Villa an hmachhawn hunah Carrick-a'n tlar lailiah Kobbie Mainoo leh Santos te an inkawptir a rinawm hle. Mainoo leh Tielemans te inkawp hi a ṭha tawk lo tih a chiang tawh a, Baleba pawh hliam vangin a inlan thei dawn lo a ni. Baleba-a hliam chungchang sawiin Carrick chuan, "Carlos-a chungchangah hian thuthar ka la nei hrih lo a, mahse a hamstring a ni. Eng nge a dinhmun zawk tih kan la enfiah a ngai ang, mahse a tir aṭanga thlirin a lang ṭha lo hle," tiin a sawi.
Carrick hian Tielemans hi attacking midfielder-ah a chhawr tel ṭhin avangin Bruno Fernandes chu veilamah emaw bench-ah emaw an nawr liam ṭhin a. Mahse, Bruno hi Chelsea leh Roma nen an inkhelh ṭumin bul a ṭan leh tawh a, Roma lakah goal khungin Matheus Cunha-a goal hmasaber tur cross a siamsak nghe nghe. Shea Lacey pawhin chakna goal siamsakin a che ṭha hle a, fan-te chuan thla liam taa hliam aṭanga a rawn kir hnua assist vawikhat chiah nei Amad-a aia Lacey bul ṭantir tawh turin an phut meuh bawk a ni.
