France coach thar Zinedine Zidane chuan an ram squad-ah ṭhang thar player theihna nei ṭhate rawn chhawr chhoh a tum a, chung zinga mi pawimawh tak chu Manchester United centre-back Leny Yoro a ni. Under-21 aṭanga senior team-a koh chhoh a nih hnuah, UEFA Nations League-a Belgium nena an inkhelhah kum 20 mi Yoro hi bul a ṭantir nghal a ni.
He match-ah hian France chuan Chelsea defender Maxence Lacroix chu Yoro nena tlarhnung lailia inkawptirin an chhawr a. Lacroix hi a talbuai deuh va, yellow card a chawi hial laiin, Yoro erawh France player zinga khel ṭha berte zinga mi a ni thung. Khelmualah minute 90 chhung khel tluanin, match chhunga ball khawih hnem ber record a siam a, statistics lamah pawh a langsar hle a ni. France hian an star Kylian Mbappe chu hliam vangin an chhawr thei lo va, Belgium lamin goalkeeper Senne Lammens chu chawlh an pe bawk.
First-half ah Belgium chuan hma an hruai a, Romeo Lavia-a ball vawrh luh chu Dodi Lukebakio chuan goal-ah chantirin hma a hruaipui a, he goal luh kawngah hian Yoro tan tih theih a tlem hle. Mahse second-half ah bench aṭanga rawn lut Desire Doue, Rayan Cherki leh Michael Olise (goal hnih) te hmangin France chuan 4-1 ngawtin hnehna an chang ta zawk a ni.
Inkhelh chhung zawngin Belgium striker hlauhawm Romelu Lukaku chu Yoro hian a veng hneh hle a, a chet ṭhat dan hian social media lamah fak a hlawh zui nasa hle a ni. GFFN France chuan X-ah tarlangin, "Manchester United player Leny Yoro tan international football-ah bul ṭanna duhawm tak a ni. Kum 20 mi hian he hun pawimawh hi a zam phah lo va, duels-ah a chak bakah tlarhnung aṭangin ball a sem chhuak thiam hle," tiin an fak a.
French fan pakhat pawhin, "Lukaku a vawn hneh dan hi thlir a nuam takzet a ni. Minute 20 vel chauh a la liam a, mahse tharum hmang pawhin a delh zui der mai," tiin a sawi a. Mi dangte pawhin, "Yoro hian Lukaku a phuar hneh hle mai," leh "Man Utd hian player ṭha tak an kawl tih an inhre lo a nih hi," tihte'n an tarlang hlawm a ni.
He rawlthar theihna sang tak hian Manchester United ṭantute zingah Michael Carrick-a'n a chhawr dan chungchangah zawhna a siam nghal a. Tun kar tawpa Tottenham an hmachhawn hunah Yoro hi Harry Maguire aia bul ṭantir tawh turin an au chhuak nasa hle a ni. United ṭantu pakhat chuan, "Inrinni hian Maguire-a'n Yoro aia bul a ṭan chhan tur engmah a awm lo," tiin a sawi a, dang leh chuan, "Yoro hi inkhelh zawn tir rawh u, Maguire chhawr reng aṭang hian engmah kan zir chhuak lo," tiin an ngaihdan an sawi zui bawk.
Yoro-a bul ṭan hnuhnun ber chu Brighton laka 3-2 a an tlawm ṭum kha a ni a. United tlarhnungah Maguire, Lisandro Martinez, Ayden Heaven leh hliam aṭanga lo kir leh Matthijs de Ligt te awm mah se, Belgium laka Yoro-a chet ṭhat dan hian Carrick-a tan ngaihtuahna thar a siamsak ngei a rinawm a ni.
