Premier League chuan Fulham nena an inkhelh ṭuma Manchester United-in penalty an phutna chungchanga VAR studio-in thil thleng an enfiah dan transcript chu mipui hriatah an tichhuak ta.

Craven Cottage-a inkhelah hian Manchester United chu inelna hrang hrangah a zawna vawi thum tlawm mai dinhmunah an ding hman a. Lisandro Martinez-a'n mahni goal-a ball a tihluh hnu lawkah, he Argentine defender hian ball vawrhin Fulham defender Calvin Bassey-a kutah a per a. Cottagers defender hian a hmai hliah tura a ban a phar lai takin a banrekah ball hian a per a, United player-te chuan penalty phutin an au nghal ṭhawt ṭhawt a ni.

Mahse, a kutah ball hian per ngei mah se, khelmuala referee Peter Bankes leh VAR studio-a official-te chuan penalty a tling lo ve ve niin an ngai thung.

Inkhelh zawh hnuah United defender-te chuan he thil thleng chungchangah hian Bankes hi an bawr zui a, head coach Michael Carrick pawh khelmual chhungah referee nen hian an inbe lai hmuh a ni bawk.

Premier League Match Centre chuan he thutlukna siam a nih dan transcript chu an tichhuak zui a. Chuta tarlan dan chuan: "Bassey-a'n handball a nei nia ngaiha Manchester United-in penalty an phutnaa referee-in penalty a pe lo chu VAR-in a enfiah a, a nemnghet e.

"AR1: 'A taksa hnaihah a awm - a per ngei a, mahse a ban chu a taksa hnaihah a awm e'. REF: 'Khelmuala thutlukna chu inkhelh chhunzawm (play on) a ni'. VAR: 'A bante chu a taksa hnaihah a awm. Hmuh a nih ang ngeiin - khelmuala hrilhfiah a nih ang chiah hian inkhelh chhunzawm tura khelmuala thutlukna siam chu kan nemnghet e,'" tiin a inziak a ni.

Sky Sports tana he thil thleng thlirtu United striker hlui Louis Saha chuan, "Thil awm dan hi 50-50 a ni a. Tunlai dan kalphungah chuan hriatthiam a har hle tawh a ni. Ball-in a fuh dawn che tih i hriat chuan i hmai humhim tura ban phar chu mihring zia ve hrim hrim a ni. Mahse, kar tawp tin dan hi a inthlak kual reng a. Referee ṭhenkhatin ham riin penalty an pe ang a, ṭhenkhat erawh chuan 'A tling lo, khel chhunzawm rawh u' an ti thung ang," tiin a sawi.

Gary Neville pawhin Bassey chu a vannei hle niin a ngai a, a ban a phar chhoh avangin referee tan thutlukna siam ngai dinhmun a insiam chawp niin a sawi. Neville chuan, "Defender tan chuan an ban phar chhoh ngawt kha a mak hle a ni, a chhan chu referee-in thutlukna a siam a ngai dawn tih an hre reng si a. Bassey hian buaina a zawng a ni," a ti bawk.

United hian minute 89-naah Matheus Cunha-a ball pet per luh hmangin Craven Cottage-ah point khat an hlawhchhuak hram a. West London-ah hian lo tlawm ta se chu inelna hrang hrangah a zawnin vawi thum an chak lohna a tling dawn a ni.

Carrick chuan BBC Sport hnenah, "Point tam zawk hmuh kan duh a ni. Thil a kal tluan loh hun chhung hi kan tawng ṭhin a, thil te tham tak tak pawh thil lian tham taka a chan chhoh lai hun kan paltlang mek a ni. Engkim hi a famkim e tihna a ni lo. Inkhelah hnehna kan chan a ngai a ni. Vawiinah pawh kan tantute an ṭha lehpek hle a, lawm taka an au chhunzawm zel theih nan thil engemaw kan pek a ngai a ni," tiin a sawi zui bawk.