Manchester United academy-a player ṭha ber leh beiseipui ber JJ Gabriel-a'n rang taka club chhuahsan a duh thu a thlen hnuah Old Trafford-ah lungawilohna a lian hle. Red Devils hian Carabao Cup-ah Brighton & Hove Albion lakah first-team debut hlantir an lo rilruk tawh a, mahse he thil thleng avang hian an ruahmanna chu ṭhulh a ngai ta a ni.
Kum 15 mi Gabriel-a'n rilru a thlak chhan ber chu pre-season chhung leh tun season inṭan hlim match hmasa berahte khelhna hmun (minutes) a chan tlem vang a ni. He rawlthar chhuah duh thu a darh rual hian Europe-a club lian rualte chuan an ngaihven nghal em em a, United hotute erawh chuan a aiawhtute nen inremna siam tumin theihtawp an chhuah thung.
Tun dinhmunah chuan Spain lama insawn hi a hnai ber a, Barcelona emaw Real Madrid emaw a zawm a rinawm hle. England Under-17 international leh a chhungte hian Spain chu a theihna tihhmasawnna hmun remchang berah an ngai a ni.
Manchester Evening News-in a tarlan danin, Gabriel hian kar hnih liam ta khan Carrington-ah training a nei tawp ber a, chumi hnuah club chhuahsan a dil zui a ni. Mahse, a fitness vawng ṭha turin Barcelona khawpui chhunga Castelldefels-ah mimal coach ruaiin a lo in-train char char thung a ni. Thawhlehni lo thleng tur hian kum 16 a tling dawn a, hemi hnu hian transfer hi tihfel theih a nih an beisei a ni.
Gabriel leh a chhungte hi Barcelona-ah hian an kal ngun hle a. Heta a awm chhung hian tualchhung coach-te a in-train pui ṭhin a, a chang chuan an ram aṭangin mimal coach Jack Hunter chu a ko phei ṭhin bawk. Ni tlemte liam ta chhung khan Castelldefels-a British School Stadium-ah Hunter-a kaihhruaina hnuaiah a lo in-train ngawrh hle a ni.
Catalan club hian dan hrang hrang (red tape) an paltlang thei a nih chuan, he forward naupang hian Barcelona hi a in nghet thar atan a hman mai a rinawm. Real Madrid pawhin Gabriel-a lakluh nan hian hma an la nasa hle a, mahse a chhungte hian Barcelona tana a khelh hi an lo suangtuah ber ṭhin a nih avangin an tlawh ngun phah hle a ni.
He rawlthar thutlukna avang hian United-in player naupang chherchhuah kawnga an theihna chungchangah zawhna a tam hle a, mahse INEOS lamin kum 15 mi lek an club thunun an phalsak lo chu thil awm tak a ni. English champion vawi 20 lai ni tawh United hian an academy thuamchak an la tum hle tih pholangin, Liverpool aṭangin Isaac Konde leh an elpui lian Manchester City aṭangin David Eze leh Karim Cassim te an lalut thar bawk a ni.
