Manchester United manager Michael Carrick chuan international break chhung hian chinfel tur thil tam tak a hmachhawn mek a. October ni 10-a Tottenham Hotspur an hmachhawn leh hmain a team buaina chinfel nan chawlhkar khat aia tlem chauh hun a nei tawh a ni.
United hi an match hnuhnung berah Fulham nen an inhnehtawk a, hemi hnu hian hliam vanga buaina hrang hrangin a zui nghal bawk. Noussair Mazraoui chu ram tana a feh chhuah laiin a inhliam thar a, international duty nei Carrick-a squad zingah hliam nei thar ber a ni hial.
Kobbie Mainoo leh Marcus Rashford te pawh Thomas Tuchel-a enkawl England squad-ah koh an nih hnuah, hliam neuh neuh an neih avangin squad aṭangin an inhnukdawk ve ve a ni. Barcelona aṭanga a kir leh hnuah Rashford hi United tan inlan tam hle mah se, kumin season-ah hian engvangin nge a theihna sang ber a la phochhuah theih loh tih chu club legend Wayne Rooney chuan a sawifiah a ni.
Rooney chuan Rashford-a'n goal a la khung theih loh chhan chu a kawng/tai (hip) hliam vanga chhiat pui a nih a rin loh thu a sawi. Match ruk a inlan tawhnaah goal leh assist la nei miah lo mah se, United chanchina goal khung hnem ber Rooney chuan Rashford-a khelh dan phung leh team chhunga a dinhmun zawk chu a chhan lian ber a nih thu a sawi lang.
Stick to United podcast-ah Rooney chuan, "Aih, inkhelhah hian a che chhe hran lo a, match ṭhenkhatah phei chuan a nung sarh reng mai a. Mahse, a buaina ber chu goal a hlat lutuk hi a ni. Hei hi goal a khung theih loh leh chance a siam theih loh chhan bulpui ber chu a ni,
"Mual sir lamah a awm zau lutuk a, a chang phei chuan tlarhnung lamah a thuk lutuk ṭhin. Marcus Rashford ang, goal khung thei tlarhma player ṭhate hi chu goal zawn hnaih theih ang bera dah tur an ni a, mahse tun dinhmunah chuan goal a hnaih tawk lo a ni," tiin a sawi.
Kawng lehlamah, United defender hlui Rio Ferdinand chuan club tana striker dik tak an neih loh buaina sutkian nan, free agent a awm mek Real Madrid star hlui Karim Benzema chu lalut turin a rawt ve thung. Striker Benjamin Sesko chu season tharah league start a la nei lo a, chawn hliam (shin complaint) avangin Fulham nen an inhnehtawk ṭum khan a chawl a, Slovenia squad aṭang pawhin a inhnukdawk bawk a ni.
Matheus Cunha chu centre-forward ah chhawr a ni ṭhin a, Carrick hian Joshua Zirkzee pawh chhawr theihin nei tho mah se, Ferdinand chuan Benzema-a tawn hriat neih zozai hi United tan a ṭangkai hle a rin thu a sawi. Kum 38 mi Benzema hi kumin nipuia Al Hilal a chhuahsan hnuah club nei lovin a la awm a, Saudi club tan hian match 16 a khelhah goal 10 a khung hman a ni.
A YouTube channel-a United mamawh a sawinaah Ferdinand chuan, "Sesko-a inkhelh hun chhung hi control a ngai tih kan hria a nih chuan, a awm loh hian tlarhmaah innghahna tak tak (focal point) a awm lo a ni. Kan player tam zawk hian ball chang turin hnung lam an pan tlangpui a, chuvangin hmatawng innghahna kha a bo ṭhin.
"Mahse khelmual lailia hun insem theitu, phurrit inṭawm theitu leh a tawn hriat hmanga Sesko zirtir theitu tur player ṭha kan nei a nih chuan, minute 90 inkhel satliah mai aia hlu zawk kan hlawhchhuak dawn a ni. Welbeck pawh a rilruah a awm nghal a, Benzema pawh a ni tho mai. Heng player pahnihte hi kan tlarhma thuam chak theitu tur an ni," tiin Ferdinand chuan a sawi bawk.
