Pathianni zan Premier League inkhelah Fulham leh Manchester United te chu Craven Cottage-ah 1-1 in an inhnehtawk a. Fulham boss Alvaro Arbeloa chuan an chakna tur referee thutlukna avanga an hloh nia ngaiin, Harry Maguire-a chet vel dan leh referee-te thutlukna siam chu a sawisel zui hle.
Kum 43 mi Fulham manager Arbeloa hian United laka 1-0 a hma an hruai lai khan, tun season-a an Premier League match hmasaber an chak tawh mai dawn emaw a ti hman a. Second half-ah Lisandro Martinez-a ball pet chu goalkeeper Senne Lammens-a'n a lo dang zo lo a, Fulham hian hma an hruai a ni. Mahse, hun tawp dawn lamah Matheus Cunha chuan United tan goal pawimawh tak khungin an siphurh a rawn rul a, point khat ve ve insem an pawm a ngai ta a ni.
He inkhelah hian Harry Maguire chu Martinez-a nen central defence-ah bul an ṭan dun a, minute 90 an khel tluan a ni. Cunha-a'n chakna goal a khung hma hian, Maguire-a chunga an chet danah referee chuan United chu free-kick a pe a, hetiang aṭanga United-in goal an khung zui tak avang hian Arbeloa hi a thinrim hle a ni.
Kar liam taa Manchester City laka an tlawm ṭuma Michael Carrick-a'n referee thutlukna a sawisel nasat hnuah, Craven Cottage-ah referee-ten United an duhsak zawk niin Arbeloa chuan a ngai a. City-in red card an hmuh hnuah Erling Haaland-a'n goal a khung a, chu chu VAR-in a sut loh avangin Carrick-a a thinrim hle a nih kha.
Sky Sports hnenah Arbeloa chuan, "Kar kalta chhung khan thil thleng kan hria a. Inkhel hrang hrangah referee-te thiltih dan kan hmu tawh bawk a, chuvang chuan match harsa tak a ni a, kan vanduai hle bawk a ni," a ti.
Fulham manager chuan sawi chhunzawmin, "Foul zawng zawng kha an tan a ni vek mai. Goal an khung hma khan Maguire-a chunga foul an pek kha in hmu thei ang; kilo 100 zeta rit a ni a sin. Thutlukna tin mai kha anmahni tan a ni a, Man City nena an khelh hnu kha chuan helai hmuna Manchester United an tlawm an phal dawn lo tih ka hre sa vek a ni. Point khat aia tam hmuh kan phu a ni," tiin a sawichhuak a ni.
October international break hma hian Manchester United hi Premier League table-ah 12-na dinhmunah an awm mek a, Fulham erawh league match nga an khelh hnuah 19-naah an awm thung. Michael Carrick-a naute hian chawlhkar thum vel chawlh an nei dawn a, October ni 10 khian Old Trafford-ah Tottenham Hotspur an lo mikhual ang.
