Manchester United squad-te chuan club dinhmun hniam tak aṭanga dinchhuah leh nan leh head coach Michael Carrick-a thlawp zui zel nan theih tawp chhuah an tum tih player hming tarlan loh pakhat chuan a sawichhuak.
Kum 45 mi Carrick hi kar tir lam khan ban tawh mai tura ngaih a nih laiin, United board chuan a tlem berah Inrinni-a khualmual-a Chelsea an hmachhawn thleng hi chu hna chelhtir chhunzawm rih turin thutlukna an siam ta a ni. Red Devils-te hi inelna hrang hrangah a zawnin match riat chhung hnehna chang tawh lovin an awm mek a, kar liam ta khan mahni mual Old Trafford-ah Bournemouth lakah 3-0 ngawta tlawmin an mualpho hle a ni.
United hi tunah hian Premier League table-ah 16-na dinhmun luahin, relegation zone aia point khat chiahin an chungnung a, an club chanchina Premier League bul ṭan chhiat ber tum an hmachhawn mek a ni. Chuti chung chuan, United player-te chuan Carrick-a thlawpin he boruak chhia hi tihtawp an duh hle thung.
BBC thudawn danin, he player hian: "Kan zawng zawng hian thil engkim siamṭha leh vek kan duh a ni. Player-te, staff-te leh mi zawng zawng hian," tiin dressing room boruak a sawichhuak a ni.
Cherries (Bournemouth) laka 3-0 a an tlawm hnu khan, Old Trafford mipui thinrim chuan khelmual chhuahsan United player-te hi an lo au el (booed) nasa hle a. Hei hi match li an khelh chhunga an tlawm vawi thumna a ni a, hemi hma pawh hian Champions League-ah Cesc Fabregas-a enkawl Como lakah 4-1 ngawtin an lo tlawm tawh bawk a ni.
United tan match hmachhawn turte a harsa chho dawn hle. Inrinni-a Chelsea an luhchhuah hnuah, Thawhlehniah Old Trafford-ah Roma an mikhual ang a, November ni 8-ah Aston Villa an mikhual leh ang. Hemi hnu hian international break a awm ang a, November ni 22 hnua an inkhelh leh hmasak berah Anfield-ah Liverpool an tlawh ang a, November ni 25-ah Champions League-ah Sporting hmachhawnin November ni 28-ah Brentford an mikhual zui leh bawk ang.
Tun dinhmunah chuan Carrick-a'n United hi a la enkawl rih a. Sun thuchhuah danin, United board-te hian club enkawl thei tur zinga hming langsar — Antonio Conte, Eddie Howe leh Julian Nagelsmann te chu an la rintawk tak tak lo niin a tarlang. Heng manager pathumte hi tunah hian free agent vek ni mah se, Old Trafford thuneitute chuan thutlukna an la siam ngam lo a ni.
Board chhungrilah pawh ngaihdan a inang lo hle a, director of football Jason Wilcox chuan Eddie Howe hi a duh laiin, head of recruitment Christopher Vivell erawh chuan Julian Nagelsmann lakluh a duh ve thung.
Aston Villa manager Unai Emery pawh United nen hian sawizawm a ni a, mahse he Spaniard hian Villa Park-ah kum 2029 thleng contract a la neih avangin, lalut tur chuan sum tam tak sen a ngai dawn a, hei hi club hotute pawhin a harsa dawn tih an pawm a ni. Chu mai bakah, Emery hian Villa-ah player lakluh leh ruahmanna siam kawngah thuneihna zau tak a nei a, United erawh chuan manager nilovin 'head coach' anga thawk tur an duh thung a ni.
