Manchester City-in Premier League dan vawi 114 ngawt mai an bawhchhia tih hmuhchhuah a nih hnuah hremna eng nge an dawn dawn tih an nghah ṭhap laiin, Real Madrid boss Jose Mourinho-a'n Pep Guardiola leh City thubuai chungchanga a lo ṭawngelhkhelh tawhna chu sawi thar leh a ni.
City hian thil dik lo engmah an tih loh thu la ṭang mah se, kum 2009 leh 2018 inkar kum kua chhung zet khan dan an lo bawhchhe tawh tih panel-te chuan an nemnghet a, kum 2023-a hek an nihna aṭanga chhuak he thutlukna hi East Manchester club hian khinlet (appeal) an tum a ni.
City hian an appeal-ah hnehna an chang lo a nih chuan, Etihad Stadium-a Guardiola-a sulhnu ropui tak hnutchhiat chu engtin nge a nghawng ang tih zawhna a lian chho hle. Catalan manager hian kum 10 chhungin Etihad-ah hian major trophy 17 lai a chawipui hman a ni.
Bayern Munich leh Barcelona boss hlui Guardiola leh Manchester United boss hlui Mourinho te inelna hi a khirhkhanin a nung sarh reng ṭhin a ni. Kum 2024 press conference pakhatah Guardiola chuan Premier League title 6 a lak lawm dan leh Mourinho-a'n title thum a lak lawm dan chungchang an zawhna chu chhangin, Mourinho an ban ang maia a hun a tawp loh hram a beisei thu fiamthu titakin a lo sawi tawh a nih kha.
Guardiola-a'n an pahnih CV danglamna a sawilanna hian Mourinho chu a khei zak mai a, Fenerbahce manager a nih lai khan match hma press conference-ah a chhang let nghal nghe nghe a ni. Mourinho chuan, "Guardiola khan niminah ka chungchang a sawi a. Ani chuan trophy paruk a la a, keiin thum ka la thung; mahse kei chuan dik tak leh thianghlim takin ka la a ni. Ka tlawm a nih pawhin ka elpui chu ka aia a ṭhat zawk avangin lawmpuina ka hlan mai ṭhin. Thubuai (lawsuits) 150 zet hmachhawn chung khera nomawi lak kha chu ka duh ve miah lo a ni," tiin a lo sawi tawh a ni.
Tun dinhmunah hian Premier League dan an lo bawhchhiat tawh hun chhung zinga City nomawi lo lak tawhte chu hlihsak an ni thei dawn em tih ngaihven a hlawh chho hle a. Chutiang thil a thleng a nih ngat chuan Mourinho ang chi manager-te hnenah hian winner medal hlan theihna dinhmun a ding thei dawn a ni.
Kum hnih liam ta vel khan kum 63 mi Mourinho hian fiamthu titakin kum 2018 Premier League title kha an club hlui United hnenah hlan theih a nih beiseina a lo sawi lang tawh a. "Kha league title kha lak theihna hunṭha kan la nei rengin ka hria... tichuan anni (United) hian ka bonus tur min pein ka medal tur min pe bawk ang chu," tiin a lo sawi a ni.
Mourinho-a hnuaiah hian United chuan 2017-18 season kha an hmang zo a, khami ṭum khan City dawtah pahnihna (runners-up) an ni a nih kha. Hemi hnu 2018-19 season bul an ṭan chhiat em avangin December 2018 khan United chuan Mourinho hi an lo ban zui ta a ni.
City appeal chungchanga thutlukna hian Guardiola-a hmingṭhatna mai bakah, Mourinho leh United te dinhmun thlengin a nghawng theih dawn avangin football khawvelin ngun takin an thlir ṭhap mek a ni.
