Pathianni khan Craven Cottage-ah Manchester United chuan hun tawp dawn hnaiah 1-1 a inhnehtawkin Fulham lakah an inhamtang hram a. Mahse he match-ah hian hun tawp dawn hnaia Fulham lamin box chhungah kut hmanga ball an khawih (handball) nia ngaih vanga Manchester United-in penalty an hlawhchhuah tak loh chungchang chu khelmual chhung leh pawnah sawi a hlawh zui hle a, Premier League lamin thuchhuah siamin he thutlukna siam a nih chhan hi an sawifiah ta a ni.

He inkhelah hian Manchester United head coach Michael Carrick chu referee thutlukna siam danah a lungawi lo hle a, a thinrim zia chu hmuh theihin a lang chiang hle bawk. United hian mualneitu Fulham lakah hian inkhelh tluanin beisei an pha lo hle a, khelmualah zawi tak leh tha nei lo zetin chet an la a, Fulham player-te chuan tlan chakna leh tharum lamah an tlan khum hneh em em a ni. Mahse khatiang khawpa khel chhe chung khan hun tawp lamah Matheus Cunha chuan United tan goal a rawn khung a, Michael Carrick-a mualpho tur chu a rawn chhanchhuak hram a ni.

Hun tawp dawn hnaia penalty pek theihna dinhmun a thlen laia referee-in penalty a pe lo chu Carrick leh a hote tan pawm thiam a har hle a. Manchester United lamin kut hmanga ball khawih a nih ngei thu sawia an nawr viau chung pawhin penalty pek an ni ta lo a ni. He buaina kal zelah hian Premier League lam chuan official thuchhuah siamin, United tana penalty pek a nih loh chhan chu khelmuala dan ding lai behchhanin an sawifiah zui ta bawk a ni.

Craven Cottage aṭanga point khat hlawhchhuak hram mah se, Manchester United khelh dan chuan sawisel a hlawh zui hle a. Carrick-a naute hian mualneitu Fulham laka an chet muan em avang leh tlan peih lamah an hneh loh em avangin insiamṭhatna tur tam tak an nei tih a lang chiang hle. Cunha-a goal vangin tlawm lo hram mah se, referee thutlukna avanga Carrick-a lungawi lohna leh thinrimna hi Premier League thuchhuah hian a chhem dai zo kher angem tih chu hriat a la ni lo a ni.