Cristiano Ronaldo chuan Portugal Nations League camp a chhuahsan thut avangin ram tana inelna hrang hrangah inlan thei lo tura thla ruk chhung zet hrem theihna dinhmun hlauhawm a hmachhawn mek nia report a ni.

Kum 41 mi forward hian Norway an hmachhawn ṭuma starting lineup-a dah a nih loh bakah, bench aṭang pawha chhawr lova dah thawven (unused substitute) a nih tak avangin he thutlukna hi siamin Portugal team camp hi a chhuahsan zui ta a ni. He thil thleng hian boruak lian tak chhuahin, Portugal head coach Jorge Jesus leh Portuguese Football Federation president te nen emergency crisis meeting neih zui a ngaih phah hial a ni.

Manchester United legend ni bawk Ronaldo hian Nilaini khan Denmark rama Portugal national team-in training an neih meknah thinur takin mual a chhuahsan a, ram tana a mawhphurhna kalsana a chhuah tak thut avang hian thuneitute lam aṭangin thla ruk chhung zet hremna leh pawisa chawitirna (fine) na tak a tawk thei dinhmunah a ding mek a ni.

He thil thleng chungchangah hian Ronaldo-a farnu chu a thinur hle a, a unaupa dinhmun laka a lungawi lohna chu phawrhchhuakin a ṭawngchhuak ve bawk. A farnu hian Ronaldo-a international football career chu a tawp hlen tawh mai thei a nih thu a sawi lang tel bawk a ni.

Head coach Jorge Jesus nena an inkarah inbiak thiam lohna leh inhnialna a awm hnuah, Ronaldo hian hetianga national team kalsan thut hi a thlang ta a. Nations League inkhelah khan Norway lakah Jorge Jesus chuan Ronaldo hi bul a ṭantir lo a, match chhung zawng substitute bench-ah a ṭhuttir char char avangin an inkar boruak hi a chhe chho zual hle a ni.

Denmark-a training an neih lai ngeia hetiang thil hi a thlen tak avang hian, Portuguese Football Federation hotute leh manager Jorge Jesus te chu a rang lama inhmukhawmin thutlukna siam tumin crisis meeting an nei zui ta nge nge a ni. Mahse national camp aṭanga a kalchhuah tak daih avang hian dan bawhchhiatna lian tham anga ngaih a ni a, ram aiawha inkhelhnaah thla ruk chhung zet hremna a tawk thei a nih thu tarlan a ni.

Football khawvela player ropui berte zinga mi Ronaldo hi kum 41 a nih ve tawh bawk avangin, hetianga hremna lian tham a tuar a nih phei chuan a ram Portugal tana a match khelh hnuhnung ber a ni zui mai dawn em tih chu sawi a hlawh chho hle a, a farnu thusawi nen phei chuan a ram tana a fehchhuahna chu a tawp a thleng ta a nih a rinawm hle a ni.