October international break chhung khan Manchester United legend, kum 41 mi Cristiano Ronaldo chu Portugal-in Nations League match an khelh chhoh meklaiin ram team camp aṭangin a chhuak a, hei hian chanchinbute hmai a luah zui hle a ni.

Portugal head coach kum 72 mi Jorge Jesus chuan Norway an hmachhawn ṭum khan Ronaldo hi substitute-ah dahin a chhawr ta reng reng lova, Denmark an hmachhawn turah pawh he superstar hlui hi chhawr a tum loh thu a tarlang zui bawk a ni.

Norway 2-1 a an hneh hmaa press conference an neihnaah, Manchester United captain Bruno Fernandes chuan an team-mate hlui Ronaldo chungchang hi sawiin, mipuite tana hriat zui tlak tak tak thu a sawichhuak a ni. Fernandes chuan pre-match press conference-a a sawi tur zawng zawng hi Al Nassr captain Ronaldo hnenah pawh a lo sawi lawk vek tawh thu a tarlang.

"Cris-a chungchangah chuan, a hnenah inbiakna ka neipui tawh a, a hnena ka sawi bakah hian helai hmuna ka sawi tur hi chu - eng pawh thleng se, Cris hi kan ram team, kan football leh kan ram aiawha chhinchhiahna (symbol) lian ber a tling reng tawh ang tih hi a ni," tiin Fernandes chuan a sawi. "Portugal tana a thil lo tih tawh zawng zawng vang chauh a ni lova, khawvel pum tana a thil lo tih tawh vang zawk a ni. Portuguese mipuite thinlungah hian hmun pawimawh tak a luah nghet tlat a ni," tiin a sawi zawm bawk.

Jesus-a nauten Norway laka hnehna an chan zawh takah khan October international break match chu an khar ta a, Fernandes pawh Old Trafford-ah kir lehin club tana khelh chhunzawm turin a inbuatsaih leh tawh a ni. Jesus leh Ronaldo te inkarah boruak rit tak awm mah se, Fernandes chuan a khawi lam mah thlawp bik lova inremna siamtu leh remna duhtu anga inlan a thlang ta zawk a ni.

Fernandes chuan, "Thil ṭhen hrang zawnga chet hi titawp tawh ila ka ti a ni; helai national team-ah hian inṭhenna engmah a awm lo, pawn lam aṭangin thawm leh buaina eng pawh rawn thleng se, ram team hi pakhat a ni a, pakhat a ni reng bawk ang. In chhungrila buainate chu chhungkuain inkharkhipa an chinfel ṭhin ang hian, national team pawh hi kalphung pangngaia a kal a ngai a ni," tiin a sawi fiah.

He international break chhung hian Fernandes hian Nations League-a Wales, Denmark leh Norway an hmachhawnnaah minute 90 a khel tluan vek a. Sporting CP midfielder hlui hian amah leh a team-mate-te chuan Ronaldo leh Jesus te inkara buaina kimchang hi an hriat pui vek bik loh thu a sawi bawk.

"Thil pawimawh ber chu, a hmawr bawkna a tluang taka a tawp dun theihna hi a ni," tiin Fernandes chuan a sawi belh a. "Keini chu he buaina hnuai aṭang hian kan fihlim thak a; in thil sawi leh kan thil hmuhte erawh kan hria. Mahse, tlangtak a sawi chuan, players' lounge-ah hun hmang hnemin card kan leng vel mai mai a, television pawh kan en ngai lo. He buaina vir vel lakah hian kan fihlim a ni," a ti.

Ronaldo hi kumin nipui khan a World Cup hnuhnung ber a khel tawh a, mahse Ballon d'Or vawi nga dawng tawhtu hian ram tana khelh chawlhsan a la tum loh thu a nemnghet thung. Fernandes chuan Ronaldo-a'n Portugal tana a thil lo thawh chhuah tawh zawng zawngte a fak chhunzawm a, Real Madrid legend hian Portuguese mipuite laka ṭanga zahna a phu a ni tih a sawi zui bawk.

"Ka ngen duh ber chu ram hi ṭhen hrang lo la, kawng thlang kher lova an pahnih hian pawm tlang sela, zahna pe ve ve zawk se ka duh a ni. Cris hi kan ram team, kan football leh khawvel football thlenga icon lian ber a ni a, a duh a, a duh lo pawh ni se Portuguese mipuite zahna hi a phu hliah hliah a ni," tiin a sawi.

Portugal hian November thlaah Nations League campaign chhunzawm lehin Wales leh Denmark te an hmachhawn leh dawn a ni.