Kumin nipui transfer window chhung khan Manchester United tan thuamṭhat ngai hmun pawimawh ber a awm a nih chuan, chu chu tlar hnung veilam (left-back) position hi a ni chiang hle.

Mahse, United thuneitu thar INEOS chuan England defender Luke Shaw chauh chu he hmun luah tur hian a tawk tura ngaiin, left-back thar lakluh an lo ṭhulh ta a nih kha. Amaherawhchu, he English player-in hliam a tawrh ngun theih zia leh a hriselna dinhmun rintlak loh zia ngaihtuah tel miah lova thutlukna an siam hi a fuh lo hle a, a tawpah chuan club tan tihsual lian tak a ni tih a rawn lang chhuak ta a ni.

Nipui transfer bazar lai khan Manchester United fan-te chuan Luke Shaw chauh rinchhana season thar hmachhawn chu thil hlauhawm leh tihsual lian tak a nih theih zia an lo kawk tawh a. Shaw hi defender ṭha tak ni mah se, season tluanin hliam vangin a chawl ngun em em a, match tina rintlak taka inkhel thei a nih tawh loh zia ṭantute chuan an hre chiang hle a ni. Chuti chung chuan INEOS chuan Shaw-a theihna ringtawkin kal an rel tlat a. Tunah erawh he thutlukna hi tihsual lian tak a ni tih a langchiang a, club hotute pawhin an tihsual chu siamṭhat leh ngei an duh tawh a ni.

He an tihsual siamṭhat nan hian Manchester United chuan January transfer bazar lo thleng turah hma lak an tum leh ta a. An lakluh tum ber zinga mi chu Spain rama theihna sang tak pholang mek, Alejandro Balde hi a ni. Kum tir January thla hian Balde hi club dang panin a insawn chhuak mai thei dinhmunah a ding mek a, Manchester United pawh hian kumin nipui laia an lo beidawn tawhna chu theihnghilhin he Spain player lakluh tum hian beih nawn leh an tum ta a ni.

Nipui transfer window chhung khan United hian he Spanish sensation hi lakluh tumin ngaihven viau mah se, inremna an siam thei ta lo a nih kha. Tunah erawh chuan squad chhungah left-back mamawhna a san tak em avangin leh, January transfer-a Balde-a'n chhuah theihna chance a neih leh tak avangin Old Trafford club hian he hunṭha hi bawhpelh an tum tawh lo hle.

Tlar hnung veilam hi United tana harsatna lian ber pakhat a la nih chhunzawm zel avangin, January thlaa Balde lakluh tumna hian ngaihven a hlawh chho hle a. Club tan chuan nipui laia INEOS thutlukna siam fuh loh siamṭhatna hun remchang a ni dawn a, Luke Shaw chauh rinchhana kal theih a nih tawh loh zia an chian tak avangin, he Spanish revelation lakluh ngei tumin theih tawp an chhuah dawn niin a lang a ni.