Kumin nipui transfer bazar laia Brighton aṭanga £70m ngawta Manchester United zawmtu Carlos Baleba chuan, kerek hliam (ankle ligament injury) a tawrh aṭanga a damchhuah leh tak avangin October 10-a Tottenham Hotspur an hmachhawn hunah a debut match hmasaber a khel thei dawn ta niin a lang.

Kum 22 mi Baleba hian Brighton-a pre-season an neih ṭan tirh lam khan a kerek a ti hliam a. International break hma lawka United leh Fulham 1-1 a an inhnehtawk ṭum khan bench-ah a ṭhu hman tawh a, mahse head coach Michael Carrick chuan a hmanhmawh duh lova, khelmuala luhtir rih lovin a la nghaktir a ni.

Hliam a neih avang hian Baleba hi international break chhung khan Cameroon squad-ah koh tel a ni lova, hei hi United tan chuan chanchin lawmawm tak a ni thung. Carrington-a a club thar boruaka a tlangnel vat theih nan leh a theihna sang ber chhawr vat theih nana inbuatsaih nan hun ṭha a neih phah ta a ni.

International break chhung khan Baleba hian United-ah a fitness siamṭhat tumin ṭan a la char char a. Kar liam ta khan player dangte chu chawlh pek belh ni mah se, he Cameroon international hian midang ṭhenkhat nen Carrington lama kalin anmahni pualin an lo in-training zui a ni. The Athletic tarlan danin, beisei aiin a hliam hi a dam chak a, a thawhrimna leh a rilru puitlinna (work ethic) chuan United coaching staff-te a hneh hle. A kerek hliam hi thil lian tham leh ngaihtuahawm lutuk a ni lo bawk.

United coaching staff-te Baleba-a'n a ti lawm thei hi thil duhawm tak a ni a, a thawhrimna hian Carrick-a'n tlar laili (midfield) a a mi mamawh tak a ni tih a tichiang hle bawk. Carrick-a naute hi inkhelhah tha thahruai nei tawk lo leh khingpuite ang thova thawkrim tawk lo anga sawisel an tawk fo ṭhin a ni.

Chu mai bakah, Youri Tielemans leh Kobbie Mainoo te hi tlarhnung vengtu tur defensive midfield rintlak an nih tawk loh zia a lang chiang a, an kianga tlarhnung lo humhim puitu tur thawhpui ṭha an mamawh em em a ni. Report tarlan danin, Baleba hian tun kar chhung hian Ineos neih Swiss club Lausanne-Sport nena United academy team inkhelh turah, inkharkhip (behind closed doors) inkhelah a theihna a fiah hman maithei bawk a ni.

Defensive midfielder pakhat rawn luh hian United buaina zawng zawng a tifel nghal vek dawn tihna a ni lo na a, kalhmang dik bera hmalakna erawh a tling chiang hle. Baleba hian a khelhpui tharte nen an inman zual theih nan khelmualah hun (game time) a mamawh chho mek a ni.