Premier League chu September leh October inkar international break avangin chawlhkar thum chhung chawlh lailawk a nei mek a. Craven Cottage-a Fulham nen 1-1 a an inhnehtawk hnuah, Manchester United chuan chak zawk nih leh ngei tumin an inbuatsaih mek a ni.
2026/27 season bul an ṭan ṭhat tawk loh avangin head coach Michael Carrick chuan pressure lian tak a hmachhawn mek a, Old Trafford-ah hian league table mawngphaha awm mek Tottenham Hotspur an lo mikhual dawn a ni. Tottenham dinhmun a chhiat em avang hian an manager Roberto De Zerbi pawh dinhmun derthawng takah a ding mek bawk.
Manager pahnihte tana thil duh loh ber chu international match aṭanga player inhliam thar neih belh hi a ni a. United lam pawhin harsatna an tawk nual tawh a, international break chhung hian player pathum ngawtin fitness lamah harsatna an tawk a ni. Bruno Fernandes leh Noussair Mazraoui te chuan inhliam tenau an tawk a, Patrick Dorgu pawh Wales an hmachhawn ṭumin khawihrawn awm miah lovin a inhliam a, lakchhuah a ngai hial a ni.
Heng bakah hian ram tana feh chhuak hman lovin Slovenia striker Benjamin Sesko bakah England duo Kobbie Mainoo leh Marcus Rashford te chuan hliam neih sa avangin an ram squad an lo chhuahsan tawh bawk a ni.
Chutih rualin, United hmachhawn tur Tottenham Hotspur lam pawh hian hliam chungchangah buaina thar an tawk ve mek bawk. ESPN tarlan danin Netherlands-in 2-1 a Serbia an hneh ṭum khan Jan Paul van Hecke chuan a keah hliam a tuar a, club lam panin a kir leh dawn a ni.
Kum 26 mi Van Hecke hi kumin nipui bazar chhung khan Brighton aṭangin £52m zetin Spurs hian an la a. Tun season-ah Tottenham match 7 khelh tawh zinga 6-ah bul a ṭan a, mahse Old Trafford-a an zinna turah hian a inlan thei dawn lo niin a lang.
Tottenham lam hian Van Hecke-a hliam chungchangah hian thuchhuah nemnghet an la siam lo a, mahse United lakah he Dutch defender hi a inlan thei dawn em tih hriat chian nan De Zerbi-a press conference neih hun nghah phawt a ngai dawn a ni.
De Zerbi-a naute hian Red Devils an hmachhawn hunah an defender pawimawh an chhawr thei lo maithei a, mahse tun season chhungin Tottenham hian goal 8 ngawt an chhuah tawh a, goal 2 chiah an la khung thung. Karleh tawpa mahni muala Tottenham an hmachhawn hunah point 3 hlawhchhuak zo lo tur khawpin United tan chhuanlam siam theih a ni tawh dawn lo a ni.
