Manchester United rawlthar JJ Gabriel-a aiawhtute (camp) chuan scholarship deal chungchanga inbiakna neih hmain, first-team match thum—Sabah, Brighton leh Bournemouth laka match tinah minute 20 tal khelhtir an phut tih thudawnte chuan an tarlang.

Gabriel-a aiawhtute hian thla hmasa khan club chhuahsan dilna lehkha an thehlut tawh a, hemi hnu aṭang hian kum 15 mi rawlthar hian Carrington training ground a la rap leh tawh lo hrim hrim a ni.

Hriat theih danin, Gabriel-a aiawhtute hian Champions League-a Sabah an hmachhawn ṭum khan a first-team debut siamtir an duh a (mahse United-in UEFA hnena squad an thehluhah a hming a tel lo thung), Carabao Cup-a Brighton leh Premier League-a Bournemouth an hmachhawn hunah pawh khelmualah inlantir an phut bawk a ni.

United hian Brighton lakah hian Gabriel hi first-team debut tir an lo ruahman ve reng a, mahse he inkhelh hma chiah hian a aiawhtute chuan chhuah dilna lehkha hi an thehlut ta zawk a ni. Kha inkhelah khan lo inlan ta se, kum 15 mi Gabriel hi Manchester United chanchina match khel thei naupang ber a ni hial dawn a ni.

He tleirawl hian Thawhlehni hian a kum 16-na piancham a lawm dawn a, United nen pre-contract agreement ziak thei dinhmunah ding reng mah se, inkhelh hun pek chungchanga an thutiam an hlen lo nia an ngaih avangin a aiawhtute chuan hmun danga hma hun zawn an thlang ta zawk a ni.

Stockholm-a pre-season friendly-a Atletico Madrid an tum ṭum khan Michael Carrick chuan senior debut a lo pe tawh a, mahse kumin nipui chhung zawnga friendly match dang khelhah erawh minute khat pawh a chhawr nawn ta lo thung a ni.

A aiawhtuten chhuah an dil hnuah pawh United hian Gabriel-a dinhmun leh a hriselna chu an la ngaihven zui reng a.

Thla hmasa khan he boruak chungchang hi zawtin head coach Michael Carrick chuan, "He dinhmunah hian kan fimkhur hle a ngai niin ka hria. Naupang te a la ni a, kum 15 chauh a la ni. Keima tan leh club thlirna aṭang chuan, kan player naupangte dinhmun, an ṭhatna tur, an hriselna leh khelmuala an inlar dan hi kan ngaihtuah a ngai a ni. He dinhmunah hian kan vaiin uluk taka kan ngaihtuah a ṭul hle a ni," tiin a lo sawi tawh a ni.

Kar thum liam ta chhung khan Gabriel hi Barcelona khawpuiah awmin ama mimal coach nen training a nei char char a. Spanish club lian pahnih Real Madrid leh Barcelona te chuan he rawlthar lakluh tumin inbiakna an nei tawh a, Gabriel hi a chhuak a nih chuan United chuan dan anga hma lak (legal action) zui pawh an rilruk mek a ni.

A tirah chuan club chhungah inremna kawng zawn theih beiseina la nei viau mah se, tun dinhmunah chuan Gabriel hian United hi a chhuahsan ngei a rinawm ta hle a ni.