Manchester United legend Roy Keane chuan Scottish club Celtic enkawl tura an sawizawmna chu hnawlin, manager dinhmun derthawng mek enthlak paha an hna chhuhsak tum mi a nih loh thu a sawichiang.
Thla liam ta khan Scottish Premiership-a Old Firm derby-ah Celtic chuan mahni mualah an hmelma Rangers chu an hneh lo a, he match en tura Keane-a a inlan hian Celtic ṭantute zingah thawm a chawk tho nasa hle a nih kha. Scottish League Cup-a Ibrox muala Rangers laka an tlawm aṭanga ni sarih hnu leka Keane-a khelmuala a inlan avang hian, a ṭhian ṭha tak Martin O'Neill-a hmunruak luah a duh nia rinthu thehdarhin a awm zui ta a ni. O'Neill hian tun international break chhung hian club-a a hmabak tur a ngaihtuah chian tur thu a lo sawi tawh bawk.
Mahse, Keane-a thusawi hnuhnung ber aṭang chuan O'Neill-a thlak a tum loh zia a chiang hle. Nottingham Forest leh Republic of Ireland-a O'Neill-a nena lo thawkdun tawh Keane chuan The Overlap-ah heti hian a sawi: "Pressure hnuaia awm manager inkhel lai va thlir ruk tum chi ka ni lo. Chutiang ti ching chu mi tam tak ka hria a ni," tiin a sawi.
Ipswich Town-a manager hna a chelh hnuhnun ber aṭangin kum 15 lai liam tawh mah se, Sunderland boss hlui hian manager nih leh chu a la chak ve ṭhin tho tih a lo sawi tawh ṭhin a ni.
Sky Sports hnenah sawiin Keane chuan, "Kar tawpa inkhel ka en hian, team ṭhenkhat ka hmuh chuan, 'Saw hmunah sawn va kalin hna ṭha tak ka va thawk thei a ni' tiin ka ngaihtuah ṭhin. Mahse kar tawpa ka ngaihtuahna mai a ni tlangpui a, Thawhṭan zing cafe-a artui kan ka ei lai chuan chutiang rilru chu ka pu tawh ngai lo! Tunlaia manager-te'n motor kawngpui hrula an tlankual a, rilru hah taka an awmte hi ka hmu ṭhin a...
"Mahse ka rilru chhungrilah hian eng emaw chu a la awm reng a ni. Meichher chu a la mit lo a tih theih ang. Tu emawin phone-in min rawn be ta se, tu nge hria ang? Mahse chutiang a thlen chu a rinawm loh hle thung," a ti.
Keane chuan sawi zawmin, "Kum tlemte liam ta chhung khan hun remchang chu ka nei nual a, mahse contract leh coaching staff chungchang buaina a awm a, 'A thutak tak tak em ni?' tih a ngai ṭhin. A chang chuan, 'I thil tih lai mekah hian bur zawk rawh' i inti leh mai ṭhin a ni," tiin a sawi bawk.
Celtic hian manager thar an mamawh dawn em tih erawh hriat a la ni lo. Ni riat chhung leka Rangers laka ṭum thum ngawt an tlawm hnuah, kum 74 mi O'Neill chuan, "Ka dinhmun hi ngun takin ka ngaihtuah ang a, ka thlir ang," a ti a, fiamthu zuiin, "Kum hnih hnuah kum 110 ka tling tawh dawn a, chawlh hahdam a hun tawh viau maithei a ni," a ti bawk.
Chutiang a nih laiin Celtic chief executive Michael Nicholson chuan O'Neill chu thlawp chhunzawm an tum thu a tarlang a. Celtic sum dinhmun tarlan tharah £4.8million zet an hloh thu tarlan a nih rualin, Nicholson chuan, "Tun season Premiership-ah bul ṭan ṭha viau mah ila, UEFA Champions League play-off lamah erawh beidawnna kan tawk a ni. Champions League league phase luh chu kan thiltum ber a ni a, kan tlin ta lo chu pawi kan ti takzet a ni.
"Chu bakah, kar liam taa kan tlawmna kha kan tan a na tlang hle. Tunah chuan Martin leh player-te thlawpin kan ṭangho ang a, ram chhung inelna leh Europa League-a hlawhtlinna chan tumin kan rilru zawng zawng kan pe dawn a ni," tiin a sawi a ni.
