Nipui transfer window liam ta khan Manchester United chuan left-back lakluh tur hmun hrang hrangah an zawng a, mahse sum tam tak hman erawh an tum lo a ni.
Newcastle United defender Lewis Hall chu an target ber ni mah se, Newcastle lamin khauh taka hralh an phal tak tlat loh avangin Red Devils te hi an inhnukdawk a. Hemi hnu hian INEOS chuan RB Leipzig captain David Raum, Barcelona player Alejandro Balde leh Rayan Ait-Nouri te pawh an ngaihven hle a, mahse heng player-te man atan hian transfer fee tam tak sen an tum ta lo a ni.
RB Leipzig captain David Raum hi Germany international niin, kum 5 liam ta chhung khan Bundesliga-a left-back che ṭha ber leh rintlak berte zinga mi a ni char char a. Kum 28 mi hian Hoffenheim aṭanga German club hi a zawm hnua match 149 a khelhah goal 7 khungin assist vawi 30 lai a nei tawh a ni. Tunah hian Leipzig-a a contract neih lai chu a hmang zo hnai mek a, season tawpah hian a thlawna chhuak thei (free agent) a nih dawn avangin club hrang hrang mit a la hle.
Nipui liam ta khan United hian Raum hi an dawr thutak lem lo na a, a thlawna lakluh theih a nih tak dawn avangin nakkum atan chuan an lak luh tum ber zinga mi a rawn ni chho ta a ni.
Italian chanchinbu Gazzetta dello Sport tarlan danin, Serie A club lian Juventus pawhin tlarhnung thuam chak nan a thlawna lakluh theih tur player an zawng mek a. AC Milan defender Fikayo Tomori leh Raum te chu an target lian berte an ni. Raum hian Bundesliga club hi contract thar a ziahpui leh an la rinawm tho rualin, inremna an siam thei lo a nih chuan a lakluhna kawngah Manchester United chu Juventus-in an elpui lian ber tur an ni dawn a ni.
Old Trafford-ah left-back lamah hliam buaina leh harsatna a awm mek avangin, United hian Raum-a theihna leh tawnhriat hi hmang tangkai tura hma an lak chhoh vat pawh a rinawm hle. Luke Shaw chu hliam avangin match hnih chhung a inlan thei tawh lo a, Denmark tana a khelhnaah Patrick Dorgu chuan a hamstring a ti hliam ve leh bawk a ni.
Chuvang chuan United hian January transfer market-ah pawh Leipzig hotute hi dawrin, Raum hi man tlawm zawkin lakluh an tum thut maithei a ni. INEOS pawh hian tlarhnung thuam nan player thar pathum lakluh tumin hnung lamah ruahmanna an siam mek nia tarlan a ni bawk.
