Manchester United chuan Manchester City academy-a kum riat chhung lo awm tawh, kum 16 mi central midfielder David Eze chu an lakluh fel thu an puang ta.

Ineos lamin United academy thuamchak tura ruahmanna an neih mek kal zelah he rawlthar hi an la lut a, tun kar chhung ringawt pawha City aṭanga United-in academy player an lakluh pahnihna a ni ta bawk. Tun kar tir lam khan Manchester City academy aṭang bawkin Karim Cassim chu United hian an lo la tawh a, chumi rualin rawlthar dang Noah Ajayi pawhin club-ah professional contract a ziak fel bawk a ni.

Inrinni zing khan United chuan official thuchhuah siamin Eze-a lo luh thu hi an nemnghet a: "Rawlthar theihna ngah tak David Eze chuan Manchester United a rawn zawm ta. He central midfielder hian Manchester City a chhuahsan hnuah kan club hi a rawn zawm a ni. Kum 16 mi hi City academy system aṭanga rawn inzirchhuak niin, England youth level-ah pawh a lo inlan tawh bawk a ni. United-a mi zawng zawngte'n David hi duhsakna sang ber kan hlan a, kan club-ah kan lo lawm a ni," tiin an tarlang.

Eze hi City academy chhungah chuan tlar laili player beiseiawm berte zinga chhiar a nih avangin United tan chuan chanchin phurawm tak a ni a. He central midfielder naupang tak hian Darren Fletcher-a enkawl mek United Under-18 squad a zawm nghal tura beisei a ni.

City lam hi Premier League financial rules vawi 114 ngawt an bawhchhiat nia hmuhchhuah a nih avangin buaina nasa tak karah an awm mek a, chu chu an player ṭha ṭhenkhatin chhuahna kawng an zawn phahna chhan pakhat a ni thei bawk. Hman aṭang tawhin City aṭanga United academy zawm hi an lo awm nual tawh a, Charlie McNeill leh Frederic Veseli te pawh kha City academy aṭanga United lo zawm tawhte an ni.

United academy chhungah pawh hian boruak a awm lo bik lo va; kum 15 mi JJ Gabriel chuan Real Madrid leh Barcelona te ngaihven a hlawh tak em avangin United nena an contract neih lai pawtthlera chhuah a duh nia sawi a ni. Player ṭha tak tak an lo chhuakin an lo lut zel dawn a, mahse United tana pawimawh ber chu club tana khelh chak tak tak leh theihna zawng zawng hlan ngam player neih a ni a, Eze-a rawn lut hian chu kawng chu a rawn nemnghet hle a ni.