Manchester United head coach Michael Carrick chuan an captain Bruno Fernandes-a'n season liam taa mimal lawmman hrang hrang vawi thum ngawt a lo dawn tawhna form ṭha kha a hmu leh ngei dawn tih a rin thu a sawi a, chutih rualin an team-ah inhmun nghet ziah peih sa (undroppable) mi tumah an awm loh thu a tarlang bawk.

Bruno Fernandes hian tun season-ah fit taka awm zawm zelna chungchangah harsatna a hmachhawn nual a. Goal thum khungin assist vawi hnih nei tawh mah se, hengte hi Old Trafford-a Ipswich leh Sabah an hmachhawn ṭuma a siam vek an ni.

Season liam ta Premier League-ah vawi 21 ngawt assist neiin record a lo siam tawh a, mahse thla liam taa kum 32 tling he midfielder hi tun season-ah a chetsual ṭhin avangin United pawh an zia a chuai phah hle a ni. Heti heti tak hian a form chhe mah se, Carrick chuan an captain hian a theihna sang ber a phohchhuak leh thuai ang tih a ring tlat a ni.

Inbiaknaah Carrick chuan, "A theihna hi a phohchhuak leh ang tih chu thil langsa a ni. Bruno hi player ṭha berte zinga mi a ni a, a chang chuan thilte hi i duh angin a kal lo fo ṭhin a ni. He club atan hian thil ropui tak tak a lo ti tawh a, hma hunah pawh hetiang tho hian a ti chhunzawm zel dawn tih hi rinhlelhna a awm lo," tiin a sawi.

Sabah nen an inkhelh hnu aṭangin Fernandes-a khelh dan a ṭha tawk lo hle a, Inrinni inkhelah pawh khan a fit ṭhat loh zia a lang leh ṭhin. Mahse Carrick chuan he thilah hian hmachhawn buai a neih loh thu a sawi thung.

Hemi rual hian Carrick chuan team-a tel ziah tur ang zawnga dinhmun bik nei tumah an awm loh thu a sawi uar hle. Bruno Fernandes chungchang zawh ni mah se, a squad-ah tumah chu tiang bika enkawl bik an awm loh thu a tichiang a ni.

"Team-ah hian tumah inhmun nghet peih sa an awm lo. Hei hi Bruno-a chungchanga ka sawi angin ngai lo ula, tlangpui thua ka sawi a ni. Performance awm dan tur te, nunphung leh inkaihhruaina awm dan tur te, team leh squad angin hmasawnna kan neih theih nana infiahna awm tur te hi kan mamawh a ni a, he thil hi player-te hian an hria a ni. Anni pawhin standard sang tak an nei a, hlawhtlinna chan leh mi ṭha ber nih an duh a, hei hi a chiang sa hle a ni," tiin Carrick chuan a sawi.

Chutih laiin, Spurs laka bench aṭanga rawn lut a a debut siam fel tawh, £70m man midfielder Carlos Baleba chuan Madrid-a an match khelh turah bul a ṭan zui maithei a ni.

Baleba-a chet hmasak ber chungchangah Carrick chuan, "Ka hlim takzet a ni. Carlos-a'n eng thil nge a rawn thlen theih tih kan hria. Midfield position-ah duhthlan tur ṭha tak tak kan nei a, Carlos-a kan hnenah a rawn awm takah chuan inthlak danglam zung zung theihna leh remchan dan anga dinhmun hrang hranga khelh tir theihna kan nei phah a ni. A rawn inlan dan kha ka chhuang hle a, Old Trafford-a an match hmasaber a khelh fel tak avangin hmalam a pan zel theih nan rapthleng ṭha tak a ni," tiin a sawi bawk.