Paul Merson chuan Manchester United player naupang JJ Gabriel-a'n kum 16 a tlin anga ram danga club zawm a awlsam lutuk tihtawp nan FIFA transfer dan siamṭhat a ṭul thu a sawi.
European Union passport neitute tan FIFA-in an pawmpui chuan ram danga club pan hi a awlsam hle a, Spanish club lian Real Madrid hian he rawlthar lakluh nan hian ṭawngkain inremna an nei tawh nia tarlan a ni.
Kumin tir lam khan United hian Gabriel hi scholarship an chhawpchhuahsaktu a nih avangin academy training compensation hmuh theihna hak an nei a, mahse hei hi £100,000 aṭanga £300,000 inkar vel chauh a rinawm. Manchester United hotute pawhin Gabriel hi a thlawna chhuah mai an phal loh avangin, he rawlthar lalut tura hma latu European club eng pawh lakah dan hmanga hmalak pawh an rilruk mek bawk a ni.
Sky Sports News-a a ṭawngnaah Merson chuan Gabriel chungchang sawiin: "He naupang hi player ṭha tak, ṭha chungchuang tak a ni. Superstar pawh a la ni thei a, top player a nih dawn avangin Manchester United tan chuan an chan hi a na ngawt ang. He dan hi thlak ngei ngei tur a ni - ram danga a chhuah ve mai hi tihtawp a ṭul a ni. United hian he naupangah hian rinna nghatin tun dinhmun thleng tur hian an zirtir a, player puitling a nihna kawngah an pui a ni.
"Phat rual lovin theihna sang tak nei a ni a, mahse he dan hi thlak a ṭul tak zet a ni. A pawimawh ber mai chu, Real Madrid a pan dawn hi a ni. Manchester United hi khawvela club lian berte zinga mi an ni a, mahse khawvela club lian ber Real Madrid a pan dawn a ni. Real Madrid-in an ngaihven a nih chuan hnar ngam player khawvelah an awm meuh lo. Premier League-a khel mekte pawh zawt ula, Real Madrid-in an rawn dawr che a nih chuan i hnar ngai lovang," tiin a sawi.
"Naupang tan chuan hun ṭha ropui tak a ni a, mahse hemi chungchanga dan hi thlak ngei ngei a ngai a ni, a nih loh chuan thil thleng ngai hi a thleng chhunzawm zel ang. Rio Ngumoha pawh ngaihtuah ula; kum hnih liam ta khan Chelsea aṭangin a chhuak tawh bawk a ni. Hetiang thil hi a thleng reng dawn a, mahse ka ngaihtan chuan he dan hi thlak a ngai a ni. Academy-ten hard work nasa tak an thawh hnuah mi pakhat rawn kalin 'Ka chhuak dawn' an rawn ti mai hi a dik ka ti lo, an chawm seilen hnu a a thlawna ram danga an chhuak mai ṭhin hi thil dik a ni lo," tiin Merson chuan a sawi belh bawk.
Gabriel hi kum 11 a nihin United academy-ah a zawm a, hemi hma hian Arsenal, Chelsea leh West Ham United youth system-ah te a lo awm tawh ṭhin a ni. Enfield-a piang he rawlthar hi London grassroots football team Top Ballerz-ah Chelsea player Mathis Eboue (Emmanuel Eboue-a fapa) nen pawh an lo khel dun tawh ṭhin a ni. September thla khan a registration tihtawp ngenna lehkha thehluh a lo ni tawh na a, tun dinhmunah Gabriel hi United player anga in-register a la ni reng a ni.
