Napoli manager hlui Antonio Conte chuan tla hniam mek club ropui tungding leh tura khelmuala kir leh a chak thu sawiin, Premier League-a rawn luh leh theihna kawng a inhawng reng tih a tarlang.
Italian coach Conte hi Ruben Amorim-a'n Old Trafford a chhuahsan hnu khan Manchester United nena sawizawm a lo ni tawh a, kumin nipui laia Napoli a chhuahsan hnuah hna nei lovin a la awm mek a ni. Napoli-a a season hmasa berah Serie A title a lakpui a, season liam ta khan pahnihna an ni bawk. United lam hian kum 45 mi Michael Carrick chu ban an tum loh thu sawi mah se, season bul an ṭan chhiat em avangin manager lakah pressure a sang chho hle a, mahse club thuneitute chuan Carrick hi an la thlawp rih a ni.
United hian tun season Premier League match nga an khelh tawhah point nga chiah an la hlawhchhuak a, Carabao Cup-ah 2-0 a hma an hruai hnuah Brighton lakah an tlawm zui bawk a ni.
The Athletic hnena a insawinaah Conte chuan, "Nomawi, league title leh hnehna tam tak lo chang tawh, chanchin ropui tak nei club-ah i lut a nih chuan, chu an chanchin ropui zahna kawng awmchhun chu: tun dinhmunah an dinhmun a lo hniam a nih pawhin, hetiang thiltum lian hlawhtlin tura club kha dinhmun sanga hruaikir leh tura duhamna leh tumruhna neih hi a ni," tiin a sawi.
Conte chuan sawi zawmin, "Kum tin team pakhat chiah an champion thei tih chu ka hre chiang hle, mahse ka thinlungah leh fan-te, ka player-te leh club hotute thinlungah khan, 'kan champion thei a ni' tih beiseina meichher kha ka chhit nun sak tur a ni. Hnehna chang chauhvin chanchin ropui an siam ṭhin. Club tam tak chuan an hun kal tawh chanchin ropui an theihnghilh ṭan mek a, chutiang club-ah chuan kal a, an chanchin hlui kha nawtreha tieng thar leh tu nih ka duh a ni. Pressure tamna hmun, tel ve mai mai tura kal lovin, inelna tak tak hmachhawn tura kal i nih tih i inhriat chianna hmun ngeiah ka kal duh," a ti bawk.
Conte hian United hming tlang takin lam ri lo mah se, Sir Alex Ferguson-a'n kum 2012-13 season-a Premier League nomawi a chawipui hnua league title la la leh miah lo United dinhmun nen hian a inmil hle a ni. Old Trafford club hian FA Cup pahnih, League Cup pahnih leh Europa League pakhat te lo la tawh mah se, Champions League leh league title ang chi nomawi lian tak tak an inchuh pha meuh tawh lo a ni.
Season liam ta khan Carrick hian United chu Champions League khel turin a tlinpui a, mahse tun season-ah an buai chho leh ta hle mai. Hetianga an chet chhiat chhunzawm zel a nih chuan, Chelsea leh Tottenham lo enkawl tawhtu Conte tan hian Premier League-a kir lehna kawng a inhawng thei dawn a ni.
English football chungchang sawiin Conte chuan sum hman thiam a pawimawh zia a sawi lang bawk a: "Tunlaiah chuan England ramah chuan silaimu lian (bazooka) an kap puak a, hmun dang zawngah erawh silai te (pistol) an la hmang thung. Mahse sum kan hman danah hian kan fimkhur a ngai a ni. Chuvang tak chuan ruahmanna fel tak neih a pawimawh; sum chu nei mah la, fing taka hman thiam a ngai a ni," tiin a sawi zui bawk a ni.
