Barcelona chuan Manchester United rawlthar langsar JJ Gabriel chu lakluh tumin hma an la mek a, an club a pan a nih chuan first-team squad-a rang taka a inhlangkai theih nan 'sporting project' ṭha tawk an tiam niin chanchinbu hrang hrang chuan an tarlang.
Kar liam ta khan The Telegraph chuan kum 15 mi Gabriel hian free agent a nih theih nan United nena an inzawmna registration chu tihtawp nghal (immediate effect) a duh thu official-in a thehlut tawh tih an lo tarlang a ni.
Gabriel-a thutlukna hian United hotute chu a barakhaih hle a, a chhan chu Brighton hmachhawn tur Carabao Cup squad-ah pawh koh tel tura ruahman a nih vang a ni. He inkhelah hian inlan hman se chuan, kum 1956-a kum 16 leh ni 19 mi a nih laia debut siamtu David Gaskell-a record khumin United chanchina first-team khel thei naupang ber a ni thei hial ang.
Chutiang boruak karah pawh chuan United chuan a contract-ah hun a la neih avangin he harsatna hi chinfel theih an la inbeisei tlat a ni. Lam tang zawng zawng inremna a awm teuh loh chuan a registration hi hlihsak ngawt theih a ni lo a; mahse Irish passport a kawl tel miau avangin thla thara kum 16 a tlin veleh ram pawn club-te a dawr thei nghal dawn thung a ni.
United hian Gabriel hi chelh zui tlat tum mah se, Spain aṭangin ngaihventu a nei ṭha hle. SPORT tarlan danin, Barcelona chuan he rawlthar hnenah hian nakin lawka first-team squad a zawm theihna tur ruahmanna an tiam bakah, a khelh chakna ber attacking midfield laili (central attacking midfield)-ah chhawr an inhuam a, kum 16 a tlin veleh hlawh ṭha tak nena hun rei tak daih tur contract ziahpui an inpeih bawk. Barcelona sporting director Deco chuan Gabriel-a aiawhtute nen inbiakna an nei ngawrh hle a, kar liam ta khan he player leh a chhungte hi Catalonia-ah hmuh an lo ni tawh bawk a ni.
Real Madrid pawhin Gabriel hi lakluh an duh hle bawk a, Los Blancos chuan an offer thehluh chu Barcelona aiin a sang zawk niin an hria a, he rawlthar inchuhnaah hian dinhmun ṭha zawk hauh niin an inngai. Bayern Munich leh Paris Saint-Germain te pawhin Gabriel hi an ngaihven ve hle a, mahse a agent chuan Barcelona emaw Real Madrid emaw pan chu an ngaih pawimawh ber a nih thu a lo hrilh tawh thung a ni.
Kar liam ta khan Gabriel hian a Instagram-a thlalak awm zawng zawng a nuaibo vek a, hei hian United-a a hmabak tur chungchangah ngaihṭhatlohna a chawk tho zual a ni. A chhan chu a pa Joe O'Cearuill chuan United-in a fapa theihna an enkawl chhoh danah lungawilohna lian tham tak pathum a neih vang niin an tarlang. The Daily Mail tarlan danin, a pain a fapa chu kum 15 mi lek ni chungin Under-21 tan khel tawh mah se first team-ah rang zawka hlangkai a duh a ni. Premier League-a Ipswich Town leh Champions League-a Sabah an hmachhawn ṭuma first-team squad-a an telh loh te chu a pa tana lawm lohna lian a ni a, senior debut siam theihna remchangah a ngai a ni.
Gabriel erawh chuan United Under-19 tan UEFA Youth League-ah Sabah lakah goal thum (hat-trick) a khung a, Reds lamin shot vawi 44 lai an neih laia Sabah-in shot vawikhatmah an neih lohna match-ah 5-0 ngawtin an sawp a ni.
