International break a nih laiin Manchester United lamah thuthar a tam hle a. Head coach Michael Carrick-a nauten October ni 10 hma chu khelmual chhungah match khelh tur nei rih lo mah se, khelmual pawn lama thil thlengte chuan chanchinbu hmai a luah hneh hle a ni.
Football khawvel barakhaihtu lian ber chu, Manchester City chuan kum 2009 leh 2018 inkar financial fair play dan an bawhchhiat nia puhna thubuai 115 an neih zinga 114-ah thiam loh chantir an ni tih puan a ni chu a ni. City hian heng thil tihsual puhna zawng zawng hi an pha char char ṭhin a, he thutlukna lakah hian zualko (appeal) theihna hun remchang an la nei a ni.
Thuchhuah siamin City chuan, "Premier League kalphung chu kalpui mek a la ni a, thil pawimawh tak tak la tihfel tur a la awm bawk a, thuruk vawn himna khauh tak hnuaiah a la kal zel a ni. Chuvangin Manchester City FC dinhmun chu February 2023-a club thuchhuah nen khan a la inang reng a ni," tiin an tarlang.
He thil thleng hian City chauh ni lovin club dangte pawh a nghawng chho maithei a ni. City hian engtianga hremna nge an dawn dawn tih a la chian chiah loh laiin, City title lo lak tawhte hlihsak a nih tak hlauh chuan Old Trafford-a a thil lo hlawhtlinpuite chu engtin nge a awm dawn tih United goalkeeper hlui David de Gea chuan a zawt chhuak ta hial a ni.
Kum 35 mi Spanish goalkeeper, kum 2013-a United nena Premier League title la tawhtu hian kum 2012, 2018 leh 2021-ah khan City dawtah pahnihna dinhmun a lo luah tawh a. X (Twitter hlui)-ah thuziak tawi thehchhuakin De Gea chuan, "Chuti chu...... i sawiho teh ang u. Premier League title engzat chiah nge ka lak tak ang le?" tiin fiamthu zep titak deuhvin a tarlang a ni.
De Gea hian United-ah kum 12 chhung hun hmangin match 545 zet a khel hman a, FA Cup, League Cup, Europa League leh Premier League nomawite a lo chawi pui tawh a ni. Football chawlhsan zawka kum khat a awm hnuah kum 2024 khan Italian club Fiorentina a zawm a, tun thlengin an goalkeeper rinrawl ber a la ni reng a ni.
Hemi rual hian United chuan an khawpui elpui lian City aṭangin rawlthar theihna nei ṭha tak David Eze chu an la lut fel bawk. Kum 16 mi midfielder Eze hian professional contract la ni lo, kum 17 a tlin huna professional contract puitling ni nghal tur inremna a ziak a ni. Eze hi ni tlemte liam taa City aṭanga Old Trafford zawmtu Karrim Cassim hniakhnung rawn zuitu a ni bawk.
United thuchhuah chuan, "Naupang theihna ngah tak David Eze chuan Manchester United a rawn zawm ta. He central midfielder hian Manchester City a chhuahsan hnuah kan club hi a rawn zawm a ni. Kum 16 mi, City academy aṭanga rawn inzir chhuak hi England tan pawh youth level-ah a lo khel tawh a ni. United-a a hma hun atan mi tinin duhsakna sang ber kan hlan a, kan club-ah kan lo lawm a ni," tiin an puangzar a ni.
